Qaartitsinerup sakkortuallaarsimanera nassuerutigineqarpoq

- Qaartitsineq siulleq sakkortuallaaluatsiarsimasoq oqaatigisinnaavara. Matoorluarneqarnerusimasinnaagaluarnersoq imaluunniit qaartiterutit ikinnerulaarsimasinnaanersut oqaatigisinnaanngilara, pilersaarusiornermut pisortaq Jørgen Johansen MT Højgaardimeersoq atuagassiamut Ingeniørenimut oqarpoq.

Qaartitsinermi illorsuaq tamarmi sajuppillappoq ujarallu arsatut angitigisoq Katuap qaanut ingeriunneqarpoq Katuallu qaliata qaava arlalinnik putullugu.

- Uagut sanaartortitsisutut suliassanik suliarinnittartunik atuisartutut taamaattoqarsinnaanera akuerisinnaanngilarput, tamakku iluarsineqartariaqartut aamma oqarfigereerparput, Jørgen Johansen Ingeniørenimut oqarpoq.

Taamatut nalunaaruteqarneq sapaatit akunnerata siuliani nalunaarutigineqartup akerlerluinnaanik nalunaarutiginninneruvoq, taamanimi MT Højgaardimi nunatsinni sulianut immikkoortortaqarfimmi pisortap, Lars Bjørn Knudsenip qaartitsinermi ajutoortoqannginnerarpaa.

Lars Bjørn Knudsenip suliassanik suliarinnittartumit MT Højgaardimit qaartiterisussatut sulisussarsiarineqartumit nalunaarusiaq innersuussutigaa. Suliassanik suliarinnittartup aqutsilluarluni ajortoqanngitsumillu qaartitsisoqarnerarpaa.

- Ajunngitsumik nassuiaffigineqarnerput ilutigalugu tamanna iluarisimaarutigaarput. Aammami paasivarput oqartussanik, Sullivinnik Nakkutilliisoqarfimmik politiinillu ataatsimeeqateqarsimatsiaannarluta suliassamik suliakkikkatta suliani nangeqqissinnaasimavai, Lars Bjørn Knudsen KNR-imut oqarpoq.

Petersen, KNR-imut oqarpoq ajutoorneq inuup inuuneranik akeqarsimasinnaagaluartoq.

Akisussaasuulluni qaartiterisoq qaartiterinissamut akuersissutaanik politiinit arsaarneqarpoq, ajutoornerlu misissorneqalerluni. Politiit nassuiaasiartik naammassippassuk Sullivinnik Nakkutilliisoqarfimmiut misissuinissaminnut aamma piareersimapput.