Qaartitserujussuarneq unnerluussummik kinguneqarsinnaavoq

Nuummi Katuap eqqaani sanaartorfiusumi qaartitserujussuartoqarnera politiinit suli misissorneqarpoq. Qaartitsisartoq akuersissutaanik arsaarneqareerpoq unnerluutigineqarsinnaanissaali politiinit misissorneqarluni.
Allattoq Jens Thorin
oktobarip 22-at 2010 11:24

Nuuk Centerissap toqqammavilerneqarnerani qaartitserujussuarneq oktobarip tallimaani pivoq. Ujaqqat ti kilo tikillugu oqimaassuseqartut Katuap qalianik putooripput sulisut tupaallaatigeqisaannik.

Qaartitsinersuaqarnerani Katuaq tamakkerluni sajuppiluppoq, soorluttaaq ujaqqat arlallit qalianut tuttut, ujaqqat annersaat assammik arsamut assersuunneqarsinnaalluni.

- Qularnanngitsumik innarleerujussuarsimasinnaagaluarput, Katuap teknikkimut pisortaa Eigil Petersen oqarpoq.

Qaartiterineq aqagukkut aallarteqqinneqarpoq, tamannalu Katuamit sulisunit toqqissisimanartinneqanngitsoq Eigil Petersenip oqaatigaa.

Suliassaq politiinit misissorneqaleruttorpoq. Qaartitsisartup illoqarfiup iluani qaartitsinissamut akuersissutaa aamma arsaarinnissutigineqareerpoq. Kisiani qaartitsisartup sanaartornermilluunniit suliaqartup unnerluunneqarnissaa isummerfigitinnagu misissuinerit ingerlanneqarallartut, politiinit oqatigineqarpoq.

Suliffeqarfik MT Højgaard sanaartukkamik suliaqartuuvoq.

- Qaartitsineq sakkortusoq aamma uagut isumaqarpugut, taamaammat qaartiterinermik suliakkitavut misissueqquavut, immikkoortortaqarfimmi ittuusoq Lars Bjørn Knudsen oqarpoq.

Taassuma unnerpaa qaartiterititartik oqarsimasoq aqunneqartumik qaartiterisoqarsimasoq suullu tamarmik pissusissamisut ingerlasut.

- Nassuiaatit iluarisimaarpavut aammami takusinnaavarput qaartiterisut politiinit sullivinnillu Nakkutilliisoqarfimmit ingerlaqqinnissamut akuerineqarsimasut, Lars Bjørn Knudsen oqarpoq.

Sullivinnillu Nakkutilliisoqarfimmi pisortaq, Jesper Guldager Labansen oqarpoq , Suliamik misissueqqilertigatik politiit nalunaarusiornisasaq utaqqeqqaaritsik.