Qaartiterutit suujunnaarsinneqassapput

Qaartiterutissat 10 kiilut missaanniittut Narsami juunip tallimaani nassaarineqartut suminngaaneersimanersut misissuiffigereerlugit, inuttassarsineqanngimmata suujunnaartinnissaat politiit aalajangerpaat.
Allattoq Najaaraq Egede
juunip 10-at 2011 09:15

Qaartiterutissat taamani nassaarineqaramik inimut isumannaallisakkamut inissinneqarput ajutoortoqaqqunagu.

- Qaartartut qaartiterinermik ilinniarsimasoq suleqatigalugu misissorneqarmata paasineqarpoq ukiorpassuarni nunaannarmiissimagamik imermik ajoquserneqarsimasut, qaarsinnaajunnaarsimallutillu, Bent Ole Kleist, Kujataani Nunap immikkoortuani politiit pisortaat oqarpoq.

Qaartiterutit ukiorpassuarni silamiissimareerlutik paasissutissat tamarmik peersimammata kiap qangalu pigisimanerai paasineqarsinnaasimanngilaq.

- Sananeqaatai aallaavigalugit 1960 – 1970 missaanni sananeqarsimasuunissai ilimagaavut, taamaammat qaartiterutit qaartiterinermik ilinniarsimasoq suleqatigalugu isumannaatsumik suujunnaarsillugit qaartinneqarumaarput. Bent Ole Kleist naggasiivoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq