Qaartiterutissat suli inuttassarsinngilaat
Qaartiterutissanik assigisaannillu nakkutilliisut ima tunngavilersuipput:
- Ilungersunarpoq, qaartiterutissat dynamitit saniatigut qaartinnissaannut atortut aamma tassaniimmata. Taakku immikkoortillugit inissinneqarsimasuuppata immaqa oqartoqarsinnaagaluarpoq: "Ajunngilaq, susoqanngilaq." Kisianni meeqqat passussimasuuppatigik qanoq pisoqariaannaasimanera eqqaaginnarlugu ilungersunarpoq. Nunamut namminermut naalakkersuisoqarfimmi avatangiisinut immikkoortumi sulisoq Henriette Lynge Boller oqarpoq.
Narsami qaartiterutissat amerlasuut, aqquserngup eqqaani qimaannarneqarsimasut, sapaatiummat ullaakkut nassaarineqarput. Karsimiipputtaaq qaartitsissutissartaat, seersui allallu assigisaat.
Henriette Lynge Boller ilisimatitsivoq, qaartiterutissat pillugit nalunaarut 2007-meersoq unioqqutinneqarsimasoq aamma qaartoornaversaarnissamut iliuusissatut maleruaqqusaq unioqqutinneqarsimasoq.
Qaartiterutissalli pisoqaammata aammalu nunatsinni atorneqarunnaareernikuummata politiit pisoq pinartutut nalilinngilaat.
- Soorunami meeqqat pinnguartillutik qaarsinnanngortissappatigit tamanna ulorianartorujussuusinnaavoq, Kujataani politiit pisortaat Bent Ole Kleist KNR-imut oqarpoq, erseqqissarlugulu pisoq suli misissuiffigineqartoq.
- Siullertut qulakkeerniarsimavarput, qaartiterutissat isumannaatsumut inissinneqarnissaat. Kikkunnit pigineqarnersut aamma paasiniartussaallugu. Kikkut tamaanga iliinnarsimagaat paasigutsigu, sooq tamaangaannaq qimanneqarsimanersut apeqqutigissavarput. Mianersuaalliorneruppat akiliisitaasoqarsinnaavoq aammalu qaartiterutissartalinnik suliaqarnissamut akuersissummik arsaarinnittoqarsinnaalluni, Bent Ole Kleist oqarpoq.
