Qaartiterutissanik tuniniaaneq killilersugaajunnaarli

juulip 06-at 2005 13:19

Qaartiterutissat piaartumik killilersugaannginnerusumik tuniniaagalernissaannik Unammilleqatigiinnermut Ataatsimiititaliaq Naalakkerusisunut siunnersuuteqarpoq. Nunatsinni qaartiterutissanik tuniniaanermi KNI Pilersuisoq A/S-ip Superbyggellu kiserngaassiunnaarnissaannik siunnersuuteqarneq isumalluarfigigitsik, sanaartugassanik suliassinneqartartoq namminersortoq Mogens Larsen oqarpoq:

- Taamaattoqarnissaa sivisuumik utaqqisimavarput, qaartiterutissat killilersugaanngitsumik tunisaalissappata tamanna inuiaqatigiinnut minnerunngitsumillu sanaartornermik suliaqartunut iluaqutaassaaq, Mogens Larsen oqarpoq.

-Unammillertoqalerpat qaartiterutissat akikinnerulissapput massakkummi qaartiterutissat akisoorujussupput, Mogens Larsen oqarpoq. Massakkut akiusut eqqarsaatigalugit qaartiterutissanik tuniniaasut amerlippata akit affaannanngornissaat neriuutiginerarpaa.

- Sverigemi qaartiterutissat maaniittunut naleqqiullutik sisamariaammik akikinnerupput. Qaartiterutissanik tuniniaaneq killilersugaajunnaassagaluarpat sillimanissamut inatsisinik malinnitsitsiniarnermi allanngortoqarunnanngitsoq Mogens Larsen oqarpoq. Qaartiterutissanik akikitsumik tuniniaarusuttunut Namminersornerullutik Oqartussat neqerooruteqartariaqartut akikinnerpaamillu tuniniaasinnaasut assut qineqqunartut Mogens Larsen oqarpoq.