Qaartartumik Narsarsuarmi nassaartoqarpoq

Qulimiguulik alapernaarsuummiit HVIDBjØRNEN-imiit ippassaq Narsarsuarmukartinneqarpoq, takornarniap tuluit qaartartuliaannik nutaanngitsumik, ananasgranatimik taasartagaannik, sapaatip-akunnerata siuliani nassaarsimanera pissutigalugu. Qaartartoq Sorsunnersuup kingulliup nalaaningaanneersuusimassasoq ilimagineqarpoq, Narsarsuaq sakkutooqarfittut taamani atuukkallarmat.
apriilip 01-at 2009 17:30

Nassaarneq Nuup politeeqarfianut sakkutuunullu umiartortunut kalleriutigineqarpoq, taamaattumik qulimiguulik Narsarsualiartinneqarpoq, qaartartoq Narsami politiit peqatigalugit misissorneqassammat, qanorlu pineqassanersoq naliliiffigineqarluni. Qaartartorlu misissorneqareerserlugu, sumiiffia aallaqqaammut matuneqarallarpoq, taanna kuup eqqaaniippoq, Narsarssuarmiit kangimut kilometerinik tallimanik ungasitsigisumiilluni, sakkutuut umiartortut nittartakkaminni taama allapput.

Pisariaqassappat qaartartoq nikisinnagu qaartinneqaannassaaq. Tamannalu aqagu aalajangerneqassaaq, ilisimannittut qaartartoq misissorluareerpassuk. Taamatullu sakkutooqarfiusimasuni atortunik ulorianartunik aatsaat nassaartoqanngilaq.

Qaartartunik nutaangitsunik Kangerlussuarmi siusinnerusukkut nassaartoqareerpoq, karsimillu ilivitsumik imassanik qaartartumillu stavgranatimik imalimmik ukiut arlallit matuma siorna aamma nassaartoqarpoq, tyskit silasiorfikuata Shannonip qeqertaani.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq