Qaartartumeerisup iperagaanera uuliamut aattuumassuteqanngilaq
Lockerbiemi qaartartumeerisumik iperaaneq Libya-miup pinerliiniartartup toqussutaasinnaasumik nappaateqarnerartup nunagisamini toqusinnaanissaanik patsiseqarpa imaluunniit Tuluit Nunaata Libyallu akornanni uulia pillugu pitsaalluinnartumik isumaqatigiissuteqarsimaneranik patsiseqavippa?
Patsisigineqartoq kingulleq uppernarnerusoq naalakkersuisunik isornartorsiuisut isumaqarput. Isornartorsiuineq ima sakkortutigilerpoq allaat Brown ullumi nammineerluni imminut illersortariaqarlerluni.
Tungitsinniit sukkulluunniit quqassiiniartoqarnanilu isertuussiniartoqanngilaq aamma olia pillugu isumaqatigiissusiortoqanngilaq. Taamatuttaaq Scotlandip qanoq iliuuseqarnissaa sukkulluunniit sunnerniarneqanngilaq, Brown ullumi oqarpoq.
Lockerbiemi qaartartumeerisoq Abdel al-megrahi, Amerikamiut timmisartuannik Lockerbiemi 1988-imi qulaassisumik qaartartumeerinermut 2001-imi inuunini naallugu paarnaarussaasussanngortinneqarpoq.
Ukiulli arfineq-pingasuinnaat paarnaarussaaqqareersoq Scotlandimiut inatsiseqarnermut ministeriata iperarneqassasoq aalajangiuppaa.
Tamatuma malitsigisaanik ima nassuiaasoqarpoq:
al-Megrahi pissaanerup qaffasinnerusup eqqartuussissutaata ataaniippoq, taanna allanngortinneqarsinnaanngilaq toqunissanimi ornippaa.
Taamaakkaluartoq iperaaneq naammagittaalliornerujussuarmik pilersitsivoq.
Timmisartumik ajunaartunut ilaqutaasut aamma USA-p naalakkersuisut iperaanermik sakkortuumik isornartorsiuipput.
Piffissarlu sivikitsoq qaanngiuttoq præsident Gaddafi-p ernera oqarpoq, iperaaneq olia pillugu Libya-mik isumaqatigiissuteqarnermut atatillugu pisoq.
Ukiorpassuarni Libya-p oqartussaasuanik Tuluit Nunaata olia pillugu sunniiniarneranik akornusiinnginnissaq angujumallugu Brown nipangersimasimasoq isornartorsiuisut isumaqarput.
Aammattaaq Brown-ip oqaaseqarnissaq kissaatigisimanngilaa, matumani USA pinerliinianullu akiuunneq mianerisimallugit.
Qaartartumeerisoq iperagaasoq, Abdel al-Megrahi Libyami napparsimmavimmi angerlarnermi kingorna uniffigisaminit peruluttunut immikkoortortamut ullumi nuunneqarpoq.
