Qaartartumeerisoqarmat 27-t ikiligaapput

Tyrkiami feriartarfiit ilaanni, Marmarisimi, pingasoriarluni ippassaq qaartoqarmat ikinnerpaamik 27-t ikiligaapput. Nutaarsiassaqartitsivik Reuter taama allappoq.

Bussi 27-nik ilaasulik qaartumeerinermi eqqorneqarpoq, taakkuppullu pingasoriarluni qaartoqarnerani ikiligaasut. Qaartartoq bussip iluani issiaviit ilaasa ataannut inissinneqarsimavoq.

Qaartitsinerit aappaat pingajuallu illoqarfiup qeqqani pipput, tamaani sutorniartarfiit neriniartarfiillu imminnut qanittuararsuupput. Qaartartut tamaani eqqaavinnut inissinneqarsimapput.

Marmaris danskinit ornigarluarneqartartuuvoq, angalatitseqatigiiffimmiillu, Star Tourimiit, ilisimatitsissutigineqarpoq danskit 1.500-t 1.700-llu missaanniittut Marmarisimi maanna feriartut.

- Sulisutta Marmarisimi eqqaanilu napparsimmavippassuit alakkartereerpaat, danskinik ikiligaasimasunik manna tikillugu suli naammattoorsinngilagut, ajortumeertoqarsimanersorli suli qulakkiivinngilarput, Star Tourimiit Stig Elling oqarpoq.

Tyrkiami Marmarisimi qaartartumeerisoqarnerani ikiligaasimasut akornanni ilumut danskinik ikiligaasoqarsimanngitsoq nunanut allanut ministereqarfimmiit uppernarsarneqarpoq.