Qaartartumeerisoq Londomi najugaqarsimasorineqarpoq
Angut arfininngormat Stockholmimi imminut pilliutigaluni qaartartumeerisoq, sapaatit akunneri marluk matuma siornatigut Londonip avannaani Lutonimi najugaqarsimasutut politiinit pasineqarpoq.
Allattoq Elisa Isaksen
decembarip 13-at 2010 07:01
Angut ippassaq 29-nik ukioqalersoq, Lutonimi tagiartuisartutut ilinniartuusoq, tuluit tusagassiorfiini oqaatigineqarpoq, tassanilu nulia meeraallu marluk suli najugaqarput.
- Oqaaseqarpallaanngikkaluarluni pitsaasuuvoq. Susoqarsimanera paasigakku tupaallaatigisorujussuuara, taamaaliorsinnaasutummi isiginngikkaluarakku, Tahir Hussain, 33-nik ukiulik taxartartoq, qaartartumeerisup eqqaani najugalik, aviisimut Daily Telegraphimut oqarpoq.
Ajortumeeriniaq Stockholmimi juullimut niuffattoqaleruttortoq, biilia aqqusinermi qaarmat kisimiilluni toqutaavoq.
Nittartakkami Muslima.com-imi allaaserineqarpoq, angut Irakimi Bagdadimi inunngortuuvoq, 1992-imilu Sverigimut nuussimalluni. 2004-mi Tuluit Nunaannut nuuppoq, ukiorlu taanna katilluni.
