Qaartartumeerisoq ingasattajaarnianut ilaanngilaq

Stockholmimi angut ullut sisamat matuma siorna imminut toquutigaluni qaartippoq. Maannalu svenskit politiivi isumannaallisaasut immikkoortortaqarfiata, SÄPO-p, nalunaarusiaa saqqummersinneqartoq naapertorlugu svenskit musliimit inuusuttut illoqarfinni anginerni pingasuni: Stockholmimi, Göteborgimi Malmömilu ingasattajaalernerusarput.

Imminut toqoriaatigaluni qaartartumeerisoq, Taymour Abdulwahab, peqqarniisaarniarsinnaasunut taakkununnga 200-nut ilaanersoq aperineqarami, SÄPO-p naliliisartuata Malene Rembe-p ilaannginnerarpaa, nakuuserluni isumannaallisaanermut aarlerinartorsiortitsisimaneranik paasissutissaqanngimmat.

Islamisiortullu ingasaassiniat amerlassusaat allanngorneq ajortoq, SÄPO naliliivoq.

Inuit amerlavallaaratik ataatsimoorlutik isummersoqatigiittarnerarpaat, internetilu atorlugu isumassarsiniartarnerarlugit. Svenskilli politiivi isumannaallisaasut svenskit muslimit 30-t missaanniittut Somaliamut Afghanistanimut Pakistanimullu aallarlutik sungiusariarsimasut ilungersunartutut nalilerpaat.

Siooranartut ilisimaneqanngitsut, soorlu imminut toqoriaatigalu Stockholmimi qaartartumeerisutut ittut, naammattoornissaat ajornakusoorpoq, tunngaviusumimmi kiffaanngissuseqarsinnaatitaanerput ataqqisariaqaratsigu, SÄPO-p pisortaa, Anders Danielson, oqarpoq.

Sapinngisarput tamaat atorlugu siooranartut ilisimaneqanngitsut naammattoorniarsarisarpagut, angakkuakkamilli atortoqanngilagut, svenskit politiivini isumannaallisaasuni pisortaq taama oqarpoq.