Qaartartumeerinermi toqusimasut 200-nngorput
Indiami Mumbai-mi ippassaq qaartaartumerisoqarmat inuit toqutaasimasut 200-nngorput, ikiligaasimasullu 661-iullutik.
Qaartartut arfineq-marluk qaartinneqarput, qaartartumeerinernullu akisussaasuunerarsimasunik suli nalunaartoqanngilaq.
Mumbai Indiami aningaasarsiornermut pingaaruteqartorujussuuvoq, qaartartumeerinerillu minuttit aqqanillit iluanni pipput. Mumbai siornatigut Bombay-imik ateqarnikuugaluarpoq.
Muslimit ingasaassiniat Indiami nunap immikkoortortaani Kashmirimeersut qaartartumeerisuussangatinneqarput. Piffissami kingullermi qaartartumeerisaqattaarnernut taakku akisussaasuunerarneqartarsimapput.
Qaartartumeerinerit qimuttuitsoqarfinni pipput, qimuttuitsoqarfiillu Mumbai-p illoqarfittaata avataaniittunit ilaasut qimarrapput.
Oqarasuaatit attaveerupput, inuppassuillu qimuttuitsut aqqutaanni paatsiveerussimapput. Qimuttuitsut qaartinneqarsimasut tv-kkut takutinneqarput, inuillu sialussuup ataani pisuttut aamma takutinneqarlutik.
Naak qimuttuitsuni uiguleriinni qulingiluani ilaasut 1500-t missaanniissinnaagaluartut, ulapiffiup nalaani ilaasut 4500-t missaanniittarput.
Qimuttuitsut ilaasuisa akornanni nunanit allaneersoqarnersoq nalunaartoqarsimanngilaq.