Qaartartumeerinerit amiilaarnartut
Egyptenip ilaani Sinaip qeqertaasartaani qaartartumeerisoqarneranut tunngassuteqartunik inunnik qulinik politiit ippassaq tigusarinnissimapput. Toqutaasut ikiligaasullu qassiorpiarnerat suli erseqqissumik paasineqanngilaq. Nunarsuarmioqatigiinnillu pisoq amiilaarnartutut taaneqarpoq.
-Qaartartumeerisut tassaasimassapput inuit uppinngitsut, misigissuseqanngitsulluunniit, pisuinnaat aqqutaanni neriniartarfiit ilaanni saqisoq oqaluttuarpoq.
Qaartartumeerinerit tamanit amiilaarineqarput, akuerineqarsinnaanngitsutullu oqaatigineqarlutik.
Egyptenittaaq præsidentianut Hosni Mubarakimik qanimut suleqatilinnit upperisamut Islamimut tulluannginnerarneqarpoq.
Ingasaassillutittaaq Islamimik upperisallit, Egyptenimi innuttaasunit amerlanerusunit tapersersorneqartunit, Palæstinamilu aqutsisunit Hamasimeersunit qaartartumeerinerit akuerineqarsinnaanngilluinnartutut oqaatigineqarput. Qaartartumeerinerni danskit tallimat ikiligaapput, Cairomilu napparsimmavinnut ingerlanneqarlutik.
Israelimi Palæstinamiut sapaatip-akunnera kingulleq qaartartumeerineranni Israelimiut qulingiluat toqutaanerat Hamasimit oqaaseqarfigineqanngilluinnarsimavoq.
