Qaartartortalimmik ilumut qiteruserneqarsimavoq
Angut norskeq 29-nik ukiulik ilumut qaartartulimmik qiteruserneqarsimasoq, qiterut misissoreerlugu svenskit politiivi uppernarsaapput.
Angutip taassuma politiit ippassaq ulloqeqqata siorna attavigai, oqarluni, ullut pingasut aallarussaalluni qimarngussaaqqasimalluni, aallarussisullu qaartartortalimmik qiterusersimagaanni. Qimaasinnaasimavorli. Aallarussisut angut ilisimatissimavaaat aalassallatsiarpat qaartartoq qaassasoq.
Pinerluttoqarsimatillugu Naalagaaffiup misissuisarfiani qaartartoq misissoqqissaarneqareerpat, qaartartoq qanoq ittorpiaanersoq sapaatip-akunnerata uuma ingerlanerani paasinarsissangatinneqarpoq.
Angut 28-nik ukiulik peqataasimasorineqarluni tigusaareerpoq, angutillu allat marluk, politiinit nalunnginneqarluartut, aamma ujaarineqarput.
Angut norskeq taanna 29-nik ukiulik, qaartartortalimmik qiteruserneqartoq, jugoslaviamiunit kingoqqisuuvoq, annikitsualunnillu siusinnerusukkut pinerluuteqartarsimanini politiinit aamma nalunnginneqaatigaa.
Aviisersuaq Expressen malillugu, ikiaroornartumut attuumassutilimmut aaqqiagiinngissuteqarneq pisumut aallaaviusimavoq.