Qaartartoq aseruinerusimasinnaagaluarpoq

Qaartartoq Oslop qiterpasissuani Naalakkersuisut allaffeqarfiata eqqaani inissisimanera pissutaalluni qaartartup aseruinera annikinneruvoq. Qaartartoq allami inissisimasimasuuppat kingunerlunnerujussuusimasinnaagaluartoq qaartartunik ilisimasallip oqaatigaa.
Allattoq Apollo Jeremiassen
juulip 28-at 2011 08:38

Qaartartunut ilisimasallip norskit aviisiannut VG-mut ima oqarpoq:

- Qaartitsinerup kinguneranit aqqusineq ajoquserneqarsimanngilaq, qaartartunut ilisimasallip oqaatigaa nangillunilu:

- Biili aqqusinermi sulluliap saviminermik matullip qulerpiaanut inissinneqarsimanerata kingorna taanna putuneqarsimavoq, taamaalilluni qaartartup naqitsinera ammut nunap iluanut sammisimammat,  illorsuarnik aseruineq annikinneruvoq, qaartartunut ilisimasalik oqarpoq.

Oslomi qaartartuliap 1995-imi USA-mi Oklahomami qaartartuliaq qaartinneqartoq inuillu 168-it inuunerannik naleqartoq assigigaluarpaa. Oklahomamilu qaartartoq taamani qaarmat oqartussat illorsuanik Oklahoma Citymiittumi aseruerujussuarpoq.

Qaartartoq allamut inissinneqarsimasuuppat Oslomi Naalakkersuisut allaffeqarfissuata toqqavia aserorneqarsimassagaluarpoq, taamaalilluni illorsuaq uppisinneqarsimassagaluarpoq. Tassalu ilisimaneqartutut qaartitsinermi igalaat aammalu illorsuup saqqaata ilaat taamaallat aseruatiterput.

Tamassumunnga pissutaaneruvoq biili qaartitsinermi atorneqartoq sulluliarsuit aqquserngup ataaniittut qulinnguanurt inissinneqarsimammat, aviisi VG allappoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq