Qaarsut talittarfiat ineriartornissamut unitsitsisinnaavoq

Uummannap eqqaani Qaarsuni talittarfik ima ikkatsigaaq, allaat tinilluaraagat naloraarluni uiarneqarsinnaalluni.
Allattoq Jens Thorin
apriilip 23-at 2009 07:13

Pitsanngorsaasoqanngippat takornariartitsinermik ineriartortitsinissamik pilersaarutit piviusunngunngitsoorsinnaasut, nunaqarfimmi aqutsisut siulittaasuata Erneeraq Møllerip aarleqqutigaa.

- Talittarfipput pujortuleeqqat aalisariutit anginngikkaluit taliffigisinnaasanngilaat. Tininngalluartillugu gumminik kamippaqarluta naloraarluta uiarsinnaasarparput, Erneeraq Møller oqarpoq.

Qaarsut umiarsualivilunnermigut ikkappallaarnermigullu, nunaqarfinnut, Royal Arctic Bygdeservice-p ajornartorsiorfigisartagaannut, ilaasoq, pisortaq John Rasmussen oqarpoq.

Nunaqarfimmi aqutsisut siulittasuat nangilluni oqaluttuarpoq, sila ajunngitsillugu pajuttaatinik tikittoqaraagat ajornartorsiuteqarneq ajortoq, palammanik atortoqarlutik ikaassuisinnaasaramik.

- Kisianni anorsaalaartillugu takornartarinngilarput, umiarsuaq usigiaranilu aallaqqiinnartartoq, tassalu nammineq pisatsinnik tikittoortussaalluta utaqqinerput sivitsorsinnaasarpoq, Erneeraq Møller ima oqarpoq.

- Umiarsualivik aaqqinneqanngippat inuussutissarsiornikkut ineriartorneq unittoorsinnaasoq, Erneeraq Møller-ip aarleqqutigaa.

- Nunaqarfitta siunissaanik isumalluarpugut, inuussutissarsiutinik siuarsaanissamik innuttaasut oqallinnerat aatsaat taama annertutigilerput. Umiarsuit takornariartaatit angisuut nunaqarfitsinnut aqqusaartalernissaat sulissutigineqarpoq. Taamaammat umiarsualiveqarnikkut piaartumik aaqqiivigineqassasugut neriuppugut, aningaasarsiornermut iluaqutaassammat. Umiarsialivippummi takornariat takugunikku sarsutiinnartalernissaat ernumanarpoq, Erneeraq Møller, oqarpoq.