Qaarsuni takornarniartitsivittaarput
Ingerlatseqatigiiffik pilersinneqarpoq, isumaqaramik Kalaallit Nunaanni nunaqarfiit tikeraarnissaannut takornariat soqutiginninnerulerumaartut. Peqatigitillugu ingerlatseqatigiiffimmit isumaqartoqarpoq aningaasat takornarianit iluanaarutigineqartut Qaarsut nunaqarfiillu allat ineriartortinnissaannut tapiissutaasinnaasut pingaarutillit, Jens Otto Mikaelsen takornariartitseqatigiiffimmit nutaameersoq taama allappoq.
Tamatumunnga peqatigitillugu Qaarsut Krydstogt Touristip oqartussaasunut kaammattuutigaat, angallatinik Kalaallit Nunaanni pissutsinut naleqquttunik nunaqarfinni takornariartitsivinnilu minnerusuni takornariat sullinneqarnerannut atorneqarsinnaasunik nassaarniaqqullugit.
Qaarsuni takornariartitseqatigiiffiup takorloorpaa angallatit soorlu arfernik takusassarsiortitsinermut aalisartitsinermullu atorneqarsinnaassasut - kiisalu takornarianik piniariarluni angalatitsinernut.
Tamanna najukkani assigiinngitsuni najugalinnut takornariaqarnermut atatillugu aningaasatigut isertitsissutaasinnaavoq. Tassami Qaarsut Krydstogt Tourist isumaqarpoq aningaasat takornarianit maani atorneqartartut amerlavallaat danskit angalatitsiviisa umiarsuarujussuarnillu takornariartaatinik umiarsuaatillit toqqaannartumik iluanaarutigisaraat.
Ataatsimut isigalugu Qaarsut Krystogt Tourist neriuppoq umiarsuarujussuit takornariartaatit siunissami ullumikkorninngarnit Kalaallit Nunaanni takornarianik angalatitsisartut ilaatinnerulissagaat, Jens Otto Mikaelsen Qaarsut Krydstogt Touristimiit naggasiivoq.
