Qaarsuni qimmit toqorarpaat
Ukiorlunnerata kingunerisaanik Qaarsuni piniartut aalisartullu qimmiminnik toqoraasariaqalersinnaanertik pinaveersikkusuppaat. Qimminik toqoraanissaq pinaveersimatinneqassappat, nerukkaatissanik 1 tons-inik timmisartukkut tikisitsisoqartariaqartoq, Qaarsuni piniartut aalisartullu peqatigiiffiani siulittaasup tullia Hans Nielsen oqarpoq.
Qaarsuni qimmit 540-t missaanniipput, Hans Nielsen-ilu oqarpoq januaarip qaammataaniit maannakkumut qimmit 20-it toqunneqartariaqarsimasut. Nangilluni oqarpoq Qaarsuni KNI-mi qimminut nerukkaatissat poortat 15 kiilukkaartut nungulersut, oqaatigaalu nerukkaatissat pisiniarfimmiittut naammannavianngitsut. Qaarsuni inuussutissarsiutigalugu qimussertartut 30-upput, Hans Nielsenilu oqarpoq ikiuisoqanngippat qimmit suli amerlanerit toqorarneqartariaqalersinnaasut.
Nerukkaatissat tikisinneqassappata 20.000 kr.-nik naleqassapput, tamannalu aalisartunit piniartunillu akissaqartinneqanngimmat oqartussaasunut assigiinngitsunut aningaasanik qinnuteqartoqarpoq.
Aalisarnermut piniarnermullu Naalakkersuisoq Rasmus Frederiksen oqarpoq Qaarsormiut qinnuteqaataat tiguneqareersoq suliarineqalereersorlu. Oqaatigisinnaannginnerarpaali suliaq qaqugu naammassineqassanersoq.
