Qaarsuarsunni mittarfik matuneqarnavianngilaq

Qaarsuarsunni mittarfiup matuneqarnissaanik Naalakkersuisut maannakkorpiaq pilersaaruteqanngillat. Tamanna Naalakkersuisut inatsisartuni ilaasortamut Doris Jakobsenimut, Siumumeersumut, akissuteqaataanni takuneqarsinnaavoq. Taanna § 36 najoqqutaralugu apeqquteqaateqarpoq, tassa KNR-imi oqallinnermut atatillugu angallannermut naalakkersuisup Jens B. Frederiksenip oqaatigimmagu, Qaarsuarsunni mittarfiup matuneqarsinnaanissaa tunuarsimaarfiginagu, taannami ukiuni kingullerni isornartorsiorneqartaqimmat.
juulip 14-at 2009 08:09

Jens B. Frederiksenip akissuteqaataani, angallannerup Nunatta ineriartortinneqarneranut pingaaruteqarnera erseqqissarneqarpoq, tamatumunnga peqatigitillugu aningaasat atorneqarsinnaasut killilimmik amerlassusillit atorlugit innuttaasut sapinngisamik annerpaamik angallanneqarsinnaanissaat isiginiarneqarlutik.

Atortut annertunerpaamik atorneqarsinnaanissaat anguniarlugu Nunatsinni mittarfiit tamarmik 59-iusut qanoq atorneqarsinnaanersut misissuiffiginiarneqarput. Misissuinikkut aamma paaserusunneqarpoq, sumiiffiit ilaanni timmisartut suluusallit atornagit qulimiguullit atoraanni pitsaanerussannginnersoq. Naalakkersuisut ilanngullugu kissaatigaat, kiffartuussinissamut isumaqatigiissutit distriktinut aqqaneq-marlunnut agguataarneqarsimasut pinnagit, sullissisumut ataatsimut isumaqatigiissummik ataatsimoortumik angusaqartoqarsinnaanersoq misissuiffigineqarnissaa.

Naalakkersuisut mittarfinnik matusinissamik pilersaaruteqanngillat, kisiannili assartuinermut politikkip, Kalaallit Nunaannut tunngatillugu politikkikkut anguniakkanut pingaarnernut atatillugu siuarsaanissaq kissaatigineqartoq, Jens B. Frederiksen Doris Jakobsenimut akissuteqaammini allappoq

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq