QAAQ sapaatip akunnerata naanerani aliannaartitsileqaaq

Nuummi kulturikkut illorsuarmi Katuami tallimanngornermi arfininngornermilu qangatut poppimik tusarnaartitsisoqassaaq. Nipilersoqatigiit qangarnitsat allaanerulaartunik inuttalerlugit uummarsaqqinneqassapput. Qatanngutigiit Per Berthelsen Birthe Olsenilu siornatigut erinarsortuusimapput, sapaatip akunnerata naaneranili tusarnaartitsinissani Birthe Olsen, ukiut 25-it matuma siorna siusippallaartumik toqusoq, Julie Berthelsenimit taarserneqarsimassaaq.
februaarip 08-at 2013 07:18

Qatanngutigiit nipilersoqatigiit QAAQ peqatigalugit "Timmissatut ilillunga"-mik nuannarineqarluartumik saqqummersitsinerannit ukioq manna ukiut 30-it qaangiussimalerput. Nipilersoqatigiit taaguutaat, QAAQ, taajuminartuunera pissutigalugu toqqarneqarsimavoq, minngerunngitsumillu aamma tamatuma nalaani nuannarineqarluartunut Abba-kkunnut eqqaanarmat. QAAQ-p nipilersoriaatsit Folk/Pop/Rock atorpai, nipilersoqatigiinnullu ilisarisimaneqarluartunut  ABBA, The Beatles aamma The Eagles eqqaanarsinnaalluni - soorunami kalaallisut.  

Per aamma Julie Berthelsen nipilersoriaatsinik assigiinngitsorpassuarnik misilittagaqartunik ilisarisimaneqarluartunillu nipilersortoqassapput. Svend Aage Hansen, Niels Ostermann, Jim Milne, Lars Frederik Olsen, Kristian Herlufsen, Eigil Petersen, Viila Sandgreen, Hans Jukku Noahsen, Titken Jakobsen, Arnannguaq J. Gerstrøm aamma Krissie B. Winberg.

Matut nal. 20.30 ammarneqassapput tusarnaartitsinerlu nal. 21.00 aallartissaaq akunnernillu marlussunnik sivisussangatinneqarluni.