Qaannamik unammersuarnerit aallarteruttorput

Apollo Zeeb Qaarsuneersoq nunatsinni qaannamik unammersuarnerit aallarnerlugit angutit naatsumik parrunneranni pissartanngortut siullersaraat.

Unammersuarnermilu naatsumut parrunneq soqutigineqarnerpaanut ilaavoq, Qaannat kattuffiata siulittaasua Niels Thomassen oqarpoq.

-Naatsumullu takisuumullu sukkaniunnerit, taakkua ingerlaannaq takuneqarsinnaasaramik kikkut siulliunersut kikkullu kingulliunersut, Niels Thomassen oqarpoq.

Siornatigut peqataasartut 100-ut sinnertaraluarpaat, ukioq mannali peqataasut ukiuni pingasuni kingullerni aatsaat taamak ikitsigalutik 85-iupput. Avannaaniit Upernavimmiit kujammut Qaqortoq ilanngullugu peqataasoqarpoq. Nunanillu allaneersut arfinillit aamma peqataallutik.

Qaannamik unammersuartarneq ukiut tamaasa ingerlanneqartartoq tammatsaaliinissamik siunertaqarpoq, Niels Thomassen taama oqarpoq:

- Timersuutitut atorparput, kisiannilu malittarisassatta siullersaanniippoq tammatsaaliineq. Ilaanni taakku marluk assortuussinnaasarput, ajoqutitaqanngitsumillu atorparput.

Tammatsaaliinerlu siunertaralugu soqutiginninnerup annertusineqarnissaa anguniarneqarpoq:

- Qaannat kattuffiani tammatsaaliineq pingaarnerpaatipparput, soorlu qangatut sananeqartarnera. Taanna siammarsarutsigu, qanorlu qaannamik sananeq ajornanngitsiginersoq, soqutigineqarnerulissagaluarpoq, Niels Thomassen naggasiivoq.

Unammersuarnerit KNR radiomi nunarput aasaaneranimi malinnaaffigineqartassapput. Ullut tamaasa unnukkorsiorneq sioqqutilaarlugu arfernup qeqqanut ullormut angusat oqaatigineqartassallutik.