VIDEO Qaannamik unammersuaarneq 2015

Qaannat Unammersuarnerat 2015 Sisimiuni ingerlanneqarpoq, qajartortartullu aatsaat taamak amerlatigisut unammersuaqataapput.
Allattoq Ole Pl. Petersen
juulip 13-at 2015 14:46

Malina Amondsen ukiut 20-t matuma siorna qajartortalersimavoq, sulilu meerannguulluni 1995-imi unammersuartoqarmat siullermeerluni ujaminnassimalluni.

- Nuannertaqaaq, meeraallungali sissarmioorujoortarnikuuvunga, Malina Amondsen Peqatigiiffik Qajaq Nuummiit unammeqataasoq KNR-imut oqarpoq.

Malina unammersuarnermi matumani arnani siuttut ilagivaat, taamaakkaluartorli kinngusaqattaarnermi periagassat ilaat iluatsinngitsoortarpai.

Unammisut 104-t

Qaannamik unammisartut 104-t ataasinngornermiit arfininngorneq ilanngullugu Sisimiuni ingerlanneqartumik Nunatsinni pissartanngorniupput, nukarlerpaaq sisamanik ukioqarluni angajullerpaarlu 64-inik ukioqarluni. Ilulissat, Sisimiut, Nuuk aamma Qaqortoq peqataatitaqarput. Iluliarmiut, Sisimiormiut Nuummiullu siuttuunerupput.

- Naligiittupilussuupput, tassa imminnut guldimik ataatsimik nikingasaqattaaramik, Qaannat kattuffianni siulittaasoq Jakob-Peter Enoksen KNR-imut oqarpoq.

Qaannamik unammisuartarnerni peqataasartut siornamut sanilliullugu 40-t missaanni amerleriarsimapput.

Isumannaallisaaneq pingaartinneqarpoq

Unammersuarnermi isumannaallisaaneq pingaartinneqartorujussuuvoq, ataaserlu angut Sisimiuneersoq eqqaassanngikkaanni annerusumik perlasisoqanngilaq.

- Qitermigut annersimagami, taannalu napparsimavimmi isumagineqarluareerluni ullumikkut maanga unammiffimmukaqqippoq, ajorani unammeqataasinnaanngoqqilluni, Jakob-Peter Enoksen oqarpoq.

Inernerit ilaat

Angutit 5,7 kilometerimik unammineranni Erik Amondsen Nuummeersoq sukkanerpaavoq, 35 minutsit 19 sekundillu atorlugit.

Arnallu 4,8 kilometerimik unammineranni Angerlaq A. Olsen Ilulissaneersoq sukkanerpaavoq, 32 minutsit 32 sekundillu atorlugit.

Inernerit allat Qajaq Sisimiut facebookikkut qupperneranni takuneqarsinnaapput.