Qaannamik soqutiginninneq annertusarniarneqarpoq
Unammersuarnermi peqataasut Qaqortumeersut, Ilulissaneersut Sisiminiuneersullu katillutik 79-upput.
Qaqortumi peqatigiiffik Qajaq Qaqortoq ukiormanna aaqqissuisuuvoq, tassanilu siulittaasoq Abel Jakobsen oqarpoq, naak peqatigiiffiit peqataatitaqartut amerlanerusinnaagaluartut, unammersuarneq ataatsimut isigalugu ajunngitsumik ingerlasimasoq.
- Arlaatigut kinngusoortoqaraluartoq maqittarluni unammisoqarnerani ajutoortoqaraluartoq, unammineq ataatsimut isigalugu nuannersumik ingerlavoq, annerusumik ajutoortoqannginnami, nukappiaqqat unammisut kingusoortut ajoratik ingerlaqqipput, Qajaq Qaqortumi siulittaasoq Abel Jakobsen taama oqarpoq. Taanna aamma Qaanna kattuffiani siuttunut ilaavoq.
Qaannamik unammersuartoqarnerani qajartorsimanngitsut misilitsinneqarput.
- Unammersuarnerup nalaani qajartorlutik misiliisimanngitsut qajartortinneqarput, ukiuni kingullerni tamanna pinikuunngilaq, ukiormannalu tamanna anguneqarluni Abel Jakobsen oqarpoq.
Qaannaat sinerissami peqatigiiffiini ilaasortanngortartut amerlassusaat allanngorartut Abel Jakobsen oqarpoq, ingammik pissartanngorniunnissaq qanilliartortillugu soqutiginnittoqarnerulersartoq eqqaallugu.
Taamaammat Peqataarusulertussat peqatigiiffinniit kaammattorneqarnissaat pingaartuusoq aamma tikkuarpaa.
- Unammersuarneq qanilliartortillugu soqutiginninneq annertunerulersartoq maluginiarneqarpoq, taamaattumik qajartornermik soqutiginnittut qanilaarnermik qiimanermillu saaffigineqartarnissaat kaammattuutigineqartoq Abel Jakobsen oqarpoq.