Qaannamik kinngusaqattaarnerit uteqqipput

Qajartortartut peqatigiiffiat Qajaq København, siullermeerluni Københavnip umiarsualiviani kulturhavnimik taallugu ullumikkumiit sapaat ilanngullugu ingerlanneqartumi peqataalerpoq
aggustip 05-at 2011 07:55

Kalaallinut Tivolimi qaannamik kinngusaqattaartoqartarneranik maqaasisaqartunut pitsaasumik tusagassaqarpoq.

Tassami peqatigiiffik Qajaq København, qajartornermik takutitsinernik aaqqissuisuusaraluartoq, Københavnip umiarsualiviani sapaatiuppat takutitsiniarlutik aaqqissuussipput.

Tamanna pissaaq umiarsualivimmi Kulturhavn-imik taallugu festivalertoqarneranut, ullumi tallimanngornermi aallartittussamut aaqqissuussanut peqatigitillugu. Periarfissaqassappat qajartortartut peqatigiiffiata festivalimut peqataajartortut allunaariaqattaarnermik misiliinissaannik neqeroorfiginiarpai. Tamatuma kingorna kinngusaqattaarnermik, annaassiniarluni sungiusarnernik pinnguaatinillu nalinginnaasunik takutitsiniarput. Siulersuisuni ilaasortaq Sidsel W. Born taama ilisimatitsivoq.

Tamatuma saniatigut festivalip nalaani, qajartortartut umiarsualivimmi qajartorujoortut, sapaatip akunnerata naanerani  takuneqarsinnaassapput.

Qajartortartut peqatigiiffiat aaqqissuussinermi Kulturhavnimi siullerpaamik peqataassapput. Taakku festivalimi peqataasunit akissarsitinneqartussatut toqqagaanissartik neriuutigaat. Tassami peqatigiiffik taamatut toqqarneqartoq 25.000 koruuninik akissarsitinneqartussaammat.

Peqatigiiffik Qajaq København qajartortartunik 30-t missaanniittunik ilaasortaqarpoq, taakkulu tamarmik kalaallit qajaannik qajartortarput. Ilaasortat amerlanersaat Nunatsinni najugaqareersimasuupput.