Qaannamik angallassisinnaasutut ilinniagalik siulleq
Tamanna nutaarsiassaanngikkaluarpoq. Qajarmi tassaavoq kalaallit kultur-iannut qangarsuarli atajuarsimasoq, taamaakkaluartorli tassa Dines Mikaelsen tulluusimaaqisoq, illoqarfimmini siullersaalluni qajaq atorlugu angallassisartutut ilinniakkaminik naammassinnilluni qanittukkut allagartartaarpoq:
- Aatama ataataga ukiorpassuit qajartornermik ilinniartittarsimavaa, tassuunalu nukkama ilinniarsimavaa. Nukkamalu taamalilluni qajartorneq pillugu annertuumik oqaluttuuttarsimallunga, Qajaq atorlugu takornarianut angallassisartutut ilinniarsimasoq Dines Mikaelsen oqarpoq nangillunilu:
- Taamaattumik nammineq allagartartaarnissara sukataarussimavara takornariat amerlasuut ikiorsinnaaniassagakkit, Dines Mikaelsen oqarpoq.
Tassalumi allagartap taassuma atorfissani taanna iluaqutigilissavaa. Takornariaqarneq Tasiilamut Ammassaliullu eqqaani annertusiartuinnarpoq, ingammik pinngortitami misigisassat takornarianit ujartorneqartarput. Taamaattumik takornarianut angalatitseqatigiiffik Destination East Greenland, sumiiffinni ataasiakkaani inunnik ilinniartitsilluni aallartissimavoq, takornarianik nunakkoorlutik imaatigoorlutillu pinngortitaq immikkorluinnaq ittoq, pitsaasumik oqaluttuariutigalugulu angallassisinnaanngorniassammata, Destiantion East Greenland-imi pisortaq, Pia Assing Nielsen oqaluttuarpoq.
Qajartornermik sungiusaasartoq, Susanne Jars ukiorpassuarni Tasiilami eqqaanilu najugaqarsimasoq, qajartorluni angallassisartussanik ilinniartitsisuuvoq. Maannakkumut ataaseq naammasseqqammerpoq, sulilu allat marluk ilinniartinneqarlutik. Aammattaaq angalatitseqatigiiffik sumiiffiup kultur-ia kiisalu pinngortitaq oqaatsillu pillugit inunnik ilinniartitsinissamik pilersaaruteqarpoq.
Dines Mikaelsen-imit neriuutigineqarpoq, ilaqutariit angallataat ileqqutoqqanut pituttorsimasoq atorlugu takornariaqarnermi siunissaqalerumaarluni:
- Neriuutigaara nunatsinni ilinniarnera atorsinnaallugu, pingaartumik tunumi massumalu eqqaa ilisimasaqarfigeqigakku. Ukiut qulit takornarianut angallassisartutut sulisimavunga, sermersuarlu marloriarlunga ituissimallugu, takornarianillu tunumi misissuijumasunik amerlanerusunik angallassisarnissara anguniagaraara, Dines Mikaelsen oqarpoq.
