Qaanaarmiut ornillugit ilisimatinneqartussanngorput

oktobarip 07-at 2005 13:25

Avanersuarmi Narsaarsuup nunaata qinngornernik ulorianartunik mingutsinneqarsimaneranut nunarput akisussaaqataasoq aammali danskit naalagaaffiat piaarnerpaamik iliuuseqartariaqartoq, saliinissamullu akiliissalluni pisussaasoq, Naalakkersuisut siulittaasuat Hans Enoksen oqarpoq. Risømi ilisimatusarfik Avanersuarmi 2003-mi misissuisitsivoq, nalunaarusiaalu ippassaq saqqummermat paasinarsivoq Narsaarsuup nunaa mingutsinneqarsimasoq allaat inunnut sunniuteqarsinnaasumik. Qanaami inuttaasut ataasinngorpat ornillugit ilisimatikkiartussagitik Hans Enoksen oqarpoq:

- 2003-mi misissuinerup inernera tunngavigalugu ilisimatitsiartorniarpugut tusarniaallutalu. Nalunaarusiami saqqummiunneqartut innuttaasunut oqaluttuarineqassapput. Qallunaat nunaanniillu immikkut aamma peqataasoqassaaq.

Nunamik mingutsitsinerup inunnut sunniuteqarsinnaanera ilungersunartutut naalaakkersuisut siulittaasuata nalilerpaa.

Naalagaaffik piumaffigineqassaaq misissuinerit sukumiisut ingerlanneqassasut.

- Taamaavimmik tamarmik qulaajarneqarnissat piumasarissallugu tunuarsimaarnavianngilagut qallunaat naalagaaffiannut piumasaqassalluta.

Aamma saliisoqartariaqatoq naalakkersuisut siulittaasuat isumaqarpoq:

- Pinngitsoorani akuerisinnaanngilarput nuna piniatunit atorneqartoq taamatut inissisimaannassappat.

Amerikamiut tikitsinnagit danskit oqaloqatigeqqaarneqassapput:

- tassaangaanniit qularinngilara amerikamiut aamma tikinneqartussaajumaartut, tunngaviunerpaappummi mingutsitsisoqarneranut.

Hans Enoksen aamma oqarpoq Qaanaami paasisat tunngavigalugit partiit siuttui oqaloqatigeriarlugit danskit ministeriunerat Anders Fogh Rasmussen oqaloqatigiartussagini. Erseqqissaavoq Inughuit namminneerlutik qanoq suleriarnissartik nammineq aalajangingassarigaat. Hans Enoksen-ip peqqissutsimullu naalakkersuisup Asii Chemnitz Narupip Qaanaaq marlunngorpat tikissavaat pingasunngorpallu Moriusakassallutik.