Naalakkersuisut tikeraarnerat innuttaasunillu taatsimiisitsinerat pillugu innuttaasut isumasiorpavut.
Aperisarput siulleq aperaarput innuttaasunut ataatsimiisitsinermut malinnaanersoq angerlunilu pissarsiaqarnerarpoq.
- Ilaana pissarsiaqangaatsiarpunga, soorlu imigassamut matusinermut tunngasut taakku; imigassap atorneqarsimasup qanoq annertutiginera, tassani taakkartugaat assorsuaq tupannarput eqqarsarnarlutillu.
Alla ataatsimiinnermut aamma malinnaasimavoq:
- Malinnaaffigalugit assorsuaq nuannerpoq, ilaatigut pissangartortaqarlutik ilaatigullu eqqortinnangajattunik eqqartuipput, pissarsiaqaqaanga.
Alla ataatsimiisitsinermut malinnaasimasoq ima oqarpoq:
- Iluarisimaarpara, tikeraartoqaleraangattalu assorsuaq nuannaarutigisaqaarput, aammalu peqqutigineqartoq, imigassamik matusineq, eqqartorneqarlualermat, assorsuaq nuannaarutigeqaara, aammalu ajornartorsiutit assigiinngitsut kiisalu Naalakkersuisut qanillillugit sukumiisumik oqaloqatigileratsigit, assorsuaq nuannaaritigaara. Neriuppunga taakku neriorsuutigineqartut siuliniutissat, siunissami sulissutigalugit piaartumik aallartinneqarumaartut- uagut peqataatilluta- tamanna neriuutigaara.
Alla aperivarput ataatsimiisitsinermi aamma pissarsiaqarsimanerarpoq:
- Oqarnerattuut maani meeqqat inuusuttuaqqallu, taavalu inuussutissarsiornikkut siuarsaaniarnermut tungaatigut, kommunep naalakkersuisullu isumaqatigiissutigissagaat tusarparput.
Naalakkersuisut tikinnerat nuannaarutigaa.
- Tassami oqaatigineqarsinnaavoq ammaasutut. Aggustimili isumaginninnermut naalakkersuisup tikittussanera ilisimareerparput, kisianni Naalakkersuisut siulittaasuata taavalu peqqissutsimut naalakkersuisup tikinnissaa ilisimanngikkaluarparput, piffissalli sivikitsuaqqap ingerlanerani paasivarput tikeqataaniartut nuannaarutigaarput.