Qaanaarmiut 8,7 millioni koruunit naligi imersimagaat
Qaanaap kommuneani innuttaasut agguaqatigiissillugu 14-ileereersimasuniit qummut ukiumut 14.157 koruunit imigassarsissutigineqartartut naatsorsorneqarsimavoq. Imerneqarsimasut 8,7 millioni koruuninik naleqartut aamma naatsorsorneqarsimalluni.
Sapaatip-akunnera 18-ip imigassamik atuinerup paasisisitsiniutaanerata pinngilaatsaani akunnerup naanerani Qaanaami akissarsiffiunera imigassartorfiusimaqaaq; politiinit tupaallaatigineqanngitsumik. Ukiunut siuliinut sanilliullugu siorna imigassartorneq annertuseriarsimasoq Qaanaami politiit pisortaata Aage Jensenip, Pilersuisumi pisortaq peqatigalugu naatsorsuinerminni inerniliipput.
Agguaqatigiissillugu Qaanaami imigassartorneq 14,5 literiusimavoq, nuna tamakkerlugu agguaqatigiissitsineq 2 literinik qaangerlugu.
Politiit nalunaarput pingaartumik imigassanik kimittuunik imerneq annertuseriarsimasoq – inuusuttullu putumaruloortarnerat maluginiagassaanerarpaat, piuminaalliortarsimasullu.
-Uggornarpoq siornaamut sanilliullugu imigassartornerulersimaneq, Qaanaami politiit pisortaat Aage Jensen oqarpoq.
Qaanaap Kommuneani pinaveersaartitsinermi maannakkorpiaq siunnersorteqanngilaq; imaanngilarli sapaatip-akunnerata 18-ianni aaqqissuussisoqassanngitsoq. Politiit pisortaat Aage Jensen aaqqissuussinermi oqalugiartussat ilagissavaat.