Qaanaaq kommunerujussuassat avataaniittariaqarpoq
Avannaani Kommunerujussuassap avataaniinnissani Qaanaap kommuneata eqqarsaatigisariaqarpaa.
Tusagassiutitigut taama allappoq Qaanaami kommunalbestyrelsemi ilaasortaq, Hans Karlsen, Siumut.
Hans Karlsen naapertorlugu Qaanaap kommuneani ineriartorneq unittuujusavissimavoq, tamatumunngalu pissutaavoq illoqarfimmi pisunut Qaanaap sunniuteqanngippallaarnera.
Kommunimi aningaasaliissutissat annertulaaraangata kommunit nakkutillisoqarfiannut akueriteqqaartariaqartarpaat. Kommunerujussuanngornissamut tunngasunut isumasioqatigiinnissamut tamatuma kingunerisaanik peqataatitaqarsinnaanngillat, atorfilittallu suliaminnut tunngatillugu aamma pikkorissarsinnaanatik, akissaqannginneq tamatumani pissutaalluni.
Piniarneq kommunemi annerpaamik inuussutissarsiutaavoq, puisilli amiinik panertunik KNI-mut tunisineq unitsinneqarmat illoqarfimmi pissutsit suli ilungersunarneruleqqipput.
Hans Karlsen isumaqarpoq Qaanaap avataanit aqunneqarneranut tamakku takussutissaasut, taamaammat kommunerujussuup avataaniinnissani Qaanaap kommuneata eqqarsaatigisariaqarpaa. Qaanaaq eqqaalu, taavalu piniakkanik killilersuineq avataaniit siunissami aqunneqassanerpat, Hans Karlsen tusagassiutinut nalunaarummi aperaaq.
