Qaanaaq komité septembarip 25-anni ataatsimiissaaq

Kisitsisit siornamut imigassamik matusisoqanngikkallarneranut sanilliukkaanni, takuneqarsinnaavoq, imigassartorsimanerit pissutigalugit politiinut saaffiginninnerit, imigassamik matusisoqanngikkallarneranit maanna amerleriarsimasut. Sermitsiaq nittartakkamini taama allaaserinnippoq.

Siorna maajip qulingannit juunip 20-annut Qaanaami imigassaq matuneqarpoq, Karen Littauerip taavani imigassartorneq annilaarutigisani danskit aviisiinut oqaluttuarereeraalu.

Tamatuma kingorna Qaanaami imigassaq naalakkersuisunit matuneqarpoq, imigassarlu ammaqqinneqarmat, maannamut immiaaqqat viinnillu kisimik pisiarineqarsinnaapput. Imigassamik matusinermut atatillugu, naalakkersuisut siunissaq qaninnerusoq ungasinnerusorlu isigalugit, ilaqutariit peqqinnartumik inuunermilu naleqartitanik pitsaasunik inuuneqarnissaannut pilersitseqataaniartussamik, Qaanaaq Komitémik pilersitsipput.

- Kisitsisit toqqammaviginiarnissaat ajornakusoorpoq, tassami piffissanut assigiinngitsunut tunngasuummata. Naluara kisitsit 50 ukiormanna aggustimut tunngatillugu taaneqartoq, 2006-imi 2007-imilu aggustimit qaffasinnerunersoq. Qaanaaq Komité septembarip 25-anni ataatsimiittussaavoq, ilaasortallu kisitsisinik paasissutissinneqassapput. Isumaqarpunga suliniutit komitiimit aallartinneqartut nalilersorneqarluartariaqartut, tamatumani ilanngullugit politiit kisitsisaataat sanilliunneqarsinnaasut, taama oqarpoq Bodil Karlshøj Poulsen, Qaanaaq Komitémi ataqatigiissaarisuusoq. Taassuma ilanngullugu oqaatigaa, komitép sulinera 2008-p naalernerani nalilersorneqarumaartoq.