Inuit innarluutillit illersuisuat Christina Johnsen (talerpilleq) allatseqarfimmilu suleqatini Qaanaamut tikeraarngaassapput. Assi: Tilioq

Qaanaaq innarluutillit illersuisuannit tikeraarngaarneqalertoq

- Qaanaami innuttaasut saaffiginnissutaat tigusavut naapertorlugit Tiliumeersut Qaanaamut tikeraarnissaat pisariaqarpoq, Christina Johnsen oqarpoq.

Inuit innarluutillit illersuisuat, Christina Johnsen, Tiliullu allatseqarfianeersut maajip ulluisa 20-anni Qaanaaliassapput. 

Inuit innarluutillit illersuisuat nunatsinni illoqarfiit avannarpasinnerpaartaannut perngaammik tikeraassaaq. 

Inuit innarluutillit illersuisuat sulerisuua?

- Inuit innarluutillit illersuisuata inuit innarluutillit taakkununngalu qanigisaasut pisinnaatitaaffii maalaaruteqaruteqarnissamullu periarfissaat pillugit siunnersuisuullunilu ilitsersuisuuvoq.

- Pisortat namminersortullu suliffeqarfiutaat aamma siunnersorlugillu ilitsersuuttarpai.

- Naalagaaffiit Peqatigiit inuit innarluutillit pillugit isumaqatigiissutaat malillugu inuit innarluutillit inatsisit naapertorlugit sullinneqarnissaannik qulakkeerisarpoq.

- Nunatsinni inuit innarluutillit atugaannik naliliisarpoq.

- Inuit innarluutillit atugaat pillugit paasissutissanik katersillunilu paasissutissiisarpoq. 

Inuit innarluutillit atugarrissaarnerulernissaannut suliniutissanik siunnersuuteqartarlunilu nunatsinni inuit innarluutillit peqatigiiffiinik taakku atugarissaarnerulernissaannut suleqateqarpoq.

- Qaanaami innuttaasut saaffiginnissutaat tigusavut naapertorlugit Tiliumeersut Qaanaamut tikeraarnissaat pisariaqarpoq, Christina Johnsen oqarpoq.

Tilioq 2017-imi pilersippoq. ”Namminerisamik inuuneqarneq”-mik taallugu nalilersuinermi paasisat tassanga saqqummiunneqaqqammerput, innarluutilinnullu qanigisaasut ilaquttaminnik sapinngisamik pitsaanerpaamik ikiuussinnaaqqullugit siunnersorneqarnerisa ilitsersorneqarnerisalu ukkatarinerunissaat pisariaqartoq erserpoq.

AAMMA ATUARUK Tiliumut saaffiginnittartut amerleriangaatsiartut

- Inuit innarluutillit ilaat innarluutertik peqqutigalugu erseqqissumik oqalussinnaasanngillat allakkatigullu maalaaruteqarsinnaasaratik. Oqartussanut akiuunnissaminnut nukissaalatsisarput. Taamaammat taakkununnga qanigisaasut ikiuussinnaasarnerat naliitsuuvoq, Christina Johnsen oqarpoq. 

Tiliumut saaffiginnissutit 353-iusut

Nalilersuineq innuttaasut Tiliumut 2017-ip 2019-illu akornanni saaffiginnissutaannik 353-inik tunngaveqarpoq. Taakku 52 procentit missarluinnaat qanigisaasuneerput. 

- Saaffiginnissutit tigusatta amerlanerpaartaat kommunit Tiliup tikeraarnikuusaanneerput. Tassa Qeqqata Kommunianiit aamma Kommune Kujallermiit. Taamaammat oqarsinnaavugut paasisassarsiorluta angalasarnivut sulinitsinnut pingaaruteqaqisut, inuimmi innarluutillit taamaalillutik ornilluta saaffigisinnaanngortarmatigut, Christina Johnsen oqarpoq.

Saaffiginnissutit pingasuugaangata ataaseq ikiuutinik ikorfartoqarnissamilluunniit noqqaanermut tunngasuusarpoq, soorlu innarluutillip qanigisaanut ikiuuttartumut oqilisaassissutaasinaasumik.

AAMMA ATUARUK Innarluutillit illersuisuat: Innarluutillit Kommune Kujallermi atugarliorput

Assersuutigalugu arnaq qatanngutini angut inersimasoq pillugu allappoq, qatanngutimi nappaatai assigiinngitsorpassuarnik suussusilerneqarnikuusut. 

Arnap taassuma qatanngutaa illoqarfimmi allami najugaqarpoq, arnallu taassuma oqarnera naapertorlugu qatanngutaa isumagineqarani. Qatanngutini atuarsinnaananilu allassinnaanngitsoq illoqarfigeqatiginnginnamiuk ikiornissaa ajornakusoortikkini, arnaq taanna allapopq.

- Inummut innarluutilimmut qanigisaasut ilaqutartik asasartik inuiaqatigiinni akuunissamut akimmiffini qaangerniarlugit pisariaqartitaminik ikiorneqanngikkaangat nikallortarput, Christina Johnsen oqarpoq.

Innersuussutitalimmik nalunaarusiussasoq

Tiliumut 2017-ip aallartinnerani saaffiginnissutit ilaat aamma Qaanaameerput. 

- Qaanaamut sapaatit akunneranni uani paasisassarsioriartussaagut, Christina Johnsen oqarpoq. 

- Inuit innarluutillit ilaatigut paaqqinniffimmi peqqinnissaqarfinnilu pulaassavagut. 

Qaanaami paasisassarsiorneq pillugu nalunaarusiussapput, Qaanaamilu innarluutillit atugaat tassani nassuiarneqassapput taavalu kommunimut immaqalu Naalakkersuisunut peqqinnissaqarfimmullu innersuussutitaqassalluni.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat