Qaanaap kommuneamiut isertitaqqortunerit ilagaat
Qaanaap Kommuneani innuttaasut agguaqatigiissullugit isertitaat nunatsinni innuttaasut isertitaannut naleqqiullugit qaffasinnerpaanut ilaapput. Tamanna tunngavigalugu Namminersornerullutik Oqartussat Qaanaap Kommuneanut ikiorseeqqinniarlutik eqqarsaateqanngillat. Esmar Bergstrømip apeqquteqaataa akillugu Hans Enoksen taama allappoq.
Qaanaap Kommunea millionerpassuarnik upernassaq akiitsoqartoq saqqummiussisoqareersorlu naalakkersuisut ikiorsiiniarnersut Demokraatini ilaasortaq apeqquteqarpoq.
- Kommunit ataasiakkaat aningaasat namminneq qanoq pingaarnersiussallugit akisussaaffigaat. Aningaasaqarnikkut ajornartorsiuteqartoqalersillugu Namminersornerullutik Oqartussat immikkut ittunik tapiissuteqarnissaat naatsorsuutigineqassanngilaq Hans Enoksen allappoq.
Qaanaap kommuneani innuttaasup ataatsip agguaqatigiisillugu nunatsinni innuttaasut isertitai 3 procent sinnerlugit isertitaqartartoq akissummi aamma erseqqissarneqarpoq.
Taamaattorli tassani naatsorsuinermi kommunimut nalimmassaatit tapiissutillu ilaatinneqarput. Qaanaami innuttaasut pingasuugaangata marluk nalimmasaatinik tapiissutinillu isertitaqartarput.
Qaanaap Kommunea aningaaserivimmi 7 million koruuninik atorniarsinnaasoq naalakkersuisut juunimi akueraat. Aningaasat taakku kingusinnerpaamik maajip aallaqqaataani 2009-mi utertinneqareersimassapput. Aningaaserivik atorniarfiusussaq isumaqatigiissusiorfigineqareerpoq.
