Qaanaap kommunea kattussuunnissamut ataatsimiinernut aningaasaliiffigineqareerpoq

Qaanaap kommunea aningaasatigut ajornartorsiuteqarpoq, allaat Qaanaami kommunalbestyrelse avannaani kommunerujussuanngornissamut ataatsimiinerni peqataasinnaanani. Inatsisartuni ilaasortaq Kattusseqatigiinneersoq Anthon Frederiksen naalakkersuiusunut apeqquteqarnermini taama tunngavilersuivoq. Nunatta karsiata akiligaanik Qaanaap kommunalbestyrelsea kommunerujussuanngornissamut ataatsimeeqataasarsinnaanersoq Hans Enoksenimut apeqqutigaarput:

”Naatsersuutiginngilara landskarsip akiligaanik Qaanaap kommunalbestyrelsea ataatsimiigiartassasoq kommunitut allatulli pineqassaaq, kommunit aaqqissuuteqqinissaannut immikkoortitsereernikuuvugut taakkkualu kommuninut agguaannikuuvagut” Hans Enoksen oqarpoq. Attaveqaatitigut qarasaasiakkut najugaqaq qimannagu ataatsimiissinnaanissamut aamma aningaasaliisoqarsimavoq, sapinngisamik angalanerit minnerpaaffissaannut pisinneqassammata Hans Enoksen oqarpoq.

Kommunit namminersornerullutik oqartussanut akiitsullit kommunerussuanngornermi akiligassatik namminneq akilissagaat Hans Enoksen ilanngullugu oqaatigaa.