Qaanaap innuttai isumasiorneqanngillat
Qaanaap borgmesteria Naimanngitsoq Petersen, naalakkersuisut KANUKOKA-llu siulittaasuinut saaffiginnilluni piumasaqarpoq Aaqqissuussaanermut Isumalioqatigiissitat Qaanaaliaqqullugit, avannaanilu kommunit kattunneqarnissaat pillugit innuttaasunut ataatsimiititsiartoqqullugit. Taamaaliortoqanngippat Qaanaap Kommunea piareersimavoq KANUKOKA-mi ilaasortaanini kipitissallugu.
Borgmesteri Naimanngitsoq Petersen isumaqarpoq Qaanaami innuttat mininneqartariaqanngitsut.
-Isumalioqatigiissitaliap tikinnissaa pisariaqartipparput, Inughuit tusarneqartariaqarput, oqarpoq.
Kisiannili Aaqqissuussaanermut Isumalioqatigiissitalia maajimi Qaanaaliassamaarpoq, innuttaasunut ataatsimiititsiartorluni.
- Kommunalbestyrelsimut qinersisoqareerpat kommuninut angalaarnissarput pilersaarutigaarput. Taamaalinikkut kommunalbestyrelsit nutaat inissititersinnaaniassapput, Aaqqissuussaanermut Isumalioqatigiissitaliami ilaasortaq Jens K. Lyberth oqarpoq.