Qaanaap eqqaani mingutsitisimanerup misissuiffigineqarnera ingerlaqqissaaq

Qaanaap eqqaani timmisartortorsuup B52 - i qaartartunik useqarluni 1968 -imi nakkarnerata kingunerisaanik qinngornernik ulorianartunik mingutsitisoqarsimaneranik misissuinerit 2003-mi aallartinneqartut ingerlaannarnissaat isumaqatigiissutigineqartoq, Naalakkersuisut siulittaasuat Hans Enoksen, Danskit statsministeriat Anders Fogh Rasmussen ataatsimeeqatigereerlugu oqarpoq:

- Nalunaarusiaagallartut tunngavigalugit oqaloqatigiinnerit ingerlappaut, tassalu aalajangiunneqarpoq, avatangiisinut mingutsitinermut tunngasut ataavartumik ingerlanneqassasut isumaqatigiissutigineqarpoq, Hans Enoksen oqarpoq.

Hans Enoksen oqarpoq Narsaarsummi misissuisimanerit tunngavigalugit misissuisoqassasoq.

Kræfti akiorniarlugu suliniaqatigiiffiup Kræftens bekæmpelse misissuisitsereerluni nalunaaruteqarpoq nakkarfiup nalaani saliillutik sulisimasut allanut naleqqiullutik napparsimanerungitsut. Hans Enoksen oqarpoq taama oqartoqaraluartoq inuit Qaanaami eqqaanilu najugallit allarluinnarnik oqariartuuteqartut:

- Taavani ukiut 40-it najugallit oqariartuutaat allarluinnaapput, naak allatut ilisimatuut oqariartuueqaraluartut. Nappaatit siornatigut atugaasimanngikkaluartut atugaalersimapput, soorlu piniakkat allallu annertuumik innarluuteqalersimallutik; hans Enoksen oqarpoq.

Hans enoksen aamma oqarpoq avatangiisiinnaanngitsut aamma innuttaasut peqqissusaannik misissuisoqarnissaa pimoorullugu sulisuutigineqassasut.

Marsimi nalunaarusiaq naammassippat Hans Enoksen aamma Anders Fogh Rasmussen-ip suleriaqqinnissaq qanoq ingerlateqqinneqassanersoq isumaqatigiissutiginiarlugu ataatsimeeqatigeeqqinnissartik isumaqatigiissutigivaat.

Qinngornernik ulorianartunik ilisimatusarfiup Risø-p Qaanaap eqqaani misissuineri ukiut marluk ingerlanneqareerlutik august 2005 -imi killiffimmik nalunaarusiorneqarput. Naalakkersuisut naatsorsuutigaat marsimi inernernik takusaqaqqissallutik.