Qaanaamut Qaanaamiillu timmisartortitsisoqanngilaq

Ulluni arfineq pingasuni Qaanaamut utimullu timmisartukkut angalasoqarsinnaanngilaq.

Allakkat aamma Qaanaamut Pituffimmulluunniit apuussimanngillat nassiussisoqarsinnaasimananilu.

Air Greenland-miit nassuiaanneqarpugut kingullertigut assigiinngitsutigut ajornakusooruteqarsimallutik, timmisartoqannginneranullu tamanna peqqutaasimasoq.

Siullermik Qaanaami sila pitsaavallaarsimanngilaq, aammalu DMI-mit nalunaarutigineqarsimasoq sila sermernartitsisinnaassasoq, tamannalu timmisartut aallarsinnaajunaarnerinik kinguneqarsinnaalluni, taamaalillunilu nunap sinnerani timmisartuussinerit kinguaattoornerinik kinguneqartussanngussammat, tamanna pinngitsoorniarlugu Qaanaamut timmisartoqarsinnaasimanngitsoq,

Taama radio aviisimut nassuiaateqarpoq Air Greenland-imi tuniniaanermi pisortaq Hans Jørgen Mørch.

Taassuma aamma erseqqissaatigaa Nuummi silap ajornera pissutigalugu pilertortumik aaqqiigasuarnissaq pisariaqarsimasoq.