Qaanaami taasinerit atorunnaarsinneqarallarput

Qaanaami kommunalbestyrelsemut qinersinermi taasinerit paatsunganartinneqarmata qinersinermut ataatsimiititaliap atorsinnaanngitsutut nalilerpai. Qaanaami qinersisitsisoq Qaanaap kommuniani taasiviusimasut tamaasa nassarlugit marlunngorpat Nuuliassaaq nassuiaateqariartorluni.

Qinersinermi taasinernik kisitsinerup pissusissamisoorsimannginnera, qinersinermullu ataatsimiititaliamut kukkusunik nalunaarutiginninnerit pissutaallutik Qaanaap kommuniani kommunalbestyrelsimut qinersinermit inernerit qinersinermut ataatsimiititaliamit atorunnaarsinneqartut, ataatsimiititap siulittaasuata Kaj Kleistip ullumi radioaviisimut oqaatigaa.

Qaanaap kommunalbestyrelsianut qinerseqqittoqarnissaa allatulluunniit iliortoqassanersoq Kaj Kleistip oqaatigisinnaannginnerarpaa.

Taasiviilli tamakkerlugit qinersinermut ataatsimiititaliamit kisinneqarlutillu misissorluarneqariarpata taasinerit eqqortut oqaatigineqarsinnaalissasut Kaj Kleistip oqaatigaa.

Pappialallumi taasiviit Qaanaap kommunianeersut Nuummut apunneqassapput kisitseqqittoqassallunilu.

Qaanaami qinersinermut siulersuisut siulittaasuata Naimanngitsoq Petersenip uppernarsarpaa taasinerit atorunnaarsinneqartut, oqaatigalugulu Moriusamiit Savissivimmiillu taasiviit suli takullugit misissorneqarsimanngimmata kukkuneq tassanngaanneersimassasoq. Silap ajoqattaarnera pissutigalugu Naimanngitsoq Petersenip maanna naatsorsuutigaa taasiviit aqagu Qaanaamut apuussimaleriarpata paatsoruutaasoq paasineqarsinnaajumaartoq.

Qinersinermut ataatsimiititaliap piumasaa naammassiniarlugu Qaanaami qinersisitsisoq taasiviit tamaasa nassarlugit marlunngorpat Nuuliassaaq nassuiaateqariartorluni.

Sisimiuni Qaanaamilu qinersinermut atatillugu pisut eqqaassanngikkaanni allanik kukkunerusinnaasunik qinersinermut ataatsimiititaliamit ulloq-manna tikillugu naammattuugaqaratik Qinersinermut ataatsimiititaliap Kaj Kleistip oqaatigaa.