Qaanaami Siorapalummilu meeqqat fodboldskole-rtinneqartut

Qaanaami nunatsinnilu nunaqarfiit avannarlersaanni Siorapalummi meeqqat fodboldskolertinneqarnerat naammasseqqammerpoq. Taamaasilluni Naalakkersuisut neriorsuutaat piviusunngortinneqartoq, sungiusaasoq Kent Kielsen Kalaallit Nunaanni Isikkamik Arsaattartut kattuffiannit oqarpoq.

Qaanaami pikkorissartitsinermi atortussat umiarsuup kinguaattoorneratigut tikinngitsoorsimapput, taamaattumillu arsat qulit Kent Kielsenip nassatai atorlugit timersortarfimmilu atortuutit atorsinnaasut tamaasa atorlugit, meeqqat pikkorissartinneqarput juulip ulluisa 27-ianniit qaammatip naaneranut. Sapaammili Siorapalummukarnissamut periarfissarseriaramik ulloq taanna meeqqat timersortinneqarput.

- Nuannisartorujussuupput. Qaanaami meeqqat 33-t peqataapput. Sungiusaasunullu ikiortit arfinillit. Siorapalummiikkatta meeqqat aqqaneq-marluupput, ikiorti ataaseq. Nuannaarsaqatigeeqaagut, tamatta neriuppugut kingulleqqinneqarumaartoq, Kent Kielsen oqarpoq.

Qaanaami Siorapalummilu isikkamik arsarnermik meeqqat pikkorissartinneqarneranni assit, nittartakkami www.123hjemmeside.dk/Fodboldskole-Qaanaaq-mi takuneqarsinnaapput.