Qaanaami sanasut unittoornissamut aarleripput
Illuliortiterneq maanna uninngagallarpoq, inatsisartunut qinersinissamik suaarutiginninneq illuliornernik unitsitsimmat, inatsisartunngortullu sanaartortitsinerit unitsissagaat aarleqqutigineqarpoq:
- Qaanaami sanaartorneq univissappat ukiulluuniit tullianut kinguartinneqassappat suliffissaqartitsiniarnermik kalluissaaq, sanasoq Kim Fritza, sanasut namminersortut suliffeqarfiutaannik Fritza & Sønimik piginnittoq Sermitsiamut oqarpoq.
Illut qulit katillugit 14 millionit koruuninik nalillit sanaartorneqarnissaat naalakkersuisunut siulittaasuusimasup Hans Enoksenip neriorsuutigisimagaluarpai, inatsisartunulli qinersisoqarnissaa suaarutigineqarmat sanaartorneq unitsinneqarallarpoq.
Sanaartorneq nanginneqassanersoq naalakkersuisunngortussat aalajangiiffigisussaavaat.