Qaanaami sakkutuunut ilinniarfiliorniarneq

Kattusseqatigiit Partiat sinnerlugu inatsisartuni ilaasortaq Anton Frederiksen, naalakkersuisunut apeqquteqaateqarpoq Qaanaami sakkutuussanut ilinniarfiliortoqarsinnaanera pillugu.

Soorliuna Anthon Frederiksen inatsisartunut taama apeqquteqaateqartoq?

- Kattusseqatigiit Partiiat sinerissamiit saaffigineqartarpoq Qaanaami inuussutissarsiutigalugu ilinniartitaanermullu periarfissat annikipallaarneri oqaatigineqartarluni. Kiisalu sakkutooqarfik Thule Qaanaami innutaasuniit atorluarneqanngippallaarnera oqaatigineqartarluni, taamalillunga inatsisartunut taamakku pillugit siunnersuuteqarpunga, Anthon Frederiksen oqarpoq.

Aperaarput Kalaallit Nunaani sakkutuut sumut pisariaqartinneqarnersut.

- Kalaallit Nunarput ullumikkut nammineernerulernissaminut suliniuteqarpoq. Ullumikkullu imartakkut nunanilu eqqissisimatitani nakkutilliinerit annertuumik qallunaaniit nakkutigineqarput. Taamaalilluni siunissaq eqqarsaatigalugu sakkutuunut ilinniarfiliornissaq namminiilivinnissamut piareersarnertut isigineqartariaqarpoq, Anthon Frederiksen oqarpoq.

Anthon Frederiksen nangilluni oqarpoq Kalaallit Nunaat Danmarki kiisalu USA, ikioqatigiillutik sakkutuutut ilinniarfissaq aningaasatigut ikioqatigiillutik ilinniarfik pilersissinnaagaat.

Anthon Frederiksen-ip ilanngullugu oqaatigaa sakkutuussanut ilinniarfissaq piviusunngussappat ilinniartitsinermi kalaallit qallunaallu oqaasii atorlugit ilinniartitsineq ingerlanneqartassasoq. Ilanngullugu ilinniartut akornanni tuluit oqaasii ajornartorsiutigineqassappata sakkutooqarfimmi Thulemi nutserisut atorluarneqarsinnaasut aamma oqaatigaa.