Qaanaami qatserisartut biilimik qatserutitaarlutillu qatserisarfeqalissasoq
Biilit nutaat marluk taakku Qaanaamut umiarsuarmik ippassaq tikiunneqarput.
Qaanaami nutaamik aamma qatserutaasivittaartoqassaaq, taassumunngalu atortussat aamma tikiunneqarlutik.
Upalungaarsimasut pisortaata, Jens Dahlip oqarnera naapertorlugu qatseriviup nutaap sananeqarnissaanut qatserutaasiup toqqavia atoqqinneqartussaavoq.
- Tassungalu atatillugu utaqqisariaqassaagut Teknikkeqarfimmiit suliassat inaarutaasussat utaqqillutigit. Tassani maannakkut qatserutaasiviup toqqavia atoqqinneqartussaavoq, taamaattumik illutaa piaarneqareerpat nutaassaq tassunga ikkussorneqarumaarluni.
- Pingaarnerpaavorli atortussat tamarmik illoqarfimmut tikiunneqarmata, Jens Dahl, Avannaata Kommuniani upalungaarsimanermut pisortaq nalunaaruteqarluni KNR-imut oqarpoq.
Qatserutaasivittaassap piareernissaata tungaanut qatserussuit inissiivissaannik isumannaarsinikuunertik taassuma erseqqissaatigaa.