Qaanaami Qaarsuarsunnilu mittarfiit matuinnaqquaat

Qaanaami Qaarsuarsunnilu mittarfiit amigartooruteqarfiusumik ingerlanneqarmata matuneqarnissaat Demokraatit siunnersuutigaat.
Allattoq Elisa Isaksen
oktobarip 17-at 2007 12:23

Siunnersuulli akuersaarneqannginnissaa Naalakkersuisut inassutigaat.

- Kalaallit Nunaanni kukkunivut ilinniarfigisariaqarpavut uteriilluta aalajangiusimaannarnagit, Demokraatit tunngavilersuuteqarnerminni allapput. Demokraatit siulittaasuata tullia Palle Christiansen ima oqarpoq:

- Qaanaamut Uummannamullu angalaareerpugut, qulimiguulinnillu angallassinerup eqquteqqinneqarnissaa inuutissarsiortut innuttaasullu piumasarigaat oqaloqatiginninnitsinni paasinarsivoq, taamaammat taamaattumik siunnersuuteqarpugut. Palle Christiansen oqarpoq.

Demokraatit isumaat naapertorlugu Qaarsuarsunni mittarfik sananeqarsimasussaanngikkaluarpoq:

- Qaarsuarsunni mittarfiliortitsineq kukkunerusoq nassuerutigisariaqarparput, immitsinnullu salluliorfiginata mittarfik taanna matuinnartariaqarparput. Kiffartuussinermik isumaqatigiissut naammassineqarpat taamaaliortoqarsinnaassaaq, qulimiguulinnillu angallassineq ingerlateqqilerlugu.

Qaanaami Qaarsuarsunnilu mittarfiit matuneqarnissaannut siunnersuut Inatsisartuni ullumi siullermeerneqartussaavoq, Naalakkersuisunilli ilalernartinneqarani.