Qaanaami Preben Petersen borgmesterinngussaaq
Qaanaaq nutaamik borgmesterertaassaaq, Qaanaami Atassut, Inugguit Ataqatigiit Kattusseqatigiillu suleqatigiinnissamik isumaqatigiissuteqarnermikkut borgmesterissatut isumaqatigiissutigaat Atassummeersoq Preben Petersen, borgmesterillu tulliatut inissilluni ukiuni kingullerni sisamani borgmesteriusoq Naimanngitsoq Petersen.
Atassut Siumullu kommunalbestyrelsemut tamarmik immikkut marlunnik isertitaqarput, Inugguit Ataqatigiit, Kattusseqatigiit Demokraatillu tamarmik immikkut ataatsimik isertitaqarlutik.
Borgmesterinngortoq Preben Petersen 24-nik taaguunneqarluni kommunalbestyrelsemut isertoq borgmesterinngortinneqarpoq, naak parteeqataa Johanne Nielsen amerlanerussuteqalaarluni 26-nik taaneqaraluartoq.
Kommunalbestyrelsemi suleqatigiilersut minnerunngitsumillu borgmesterinngortitsineq pillugu Atassutip Qaanaami siulittaasua Pualuna Kivioq oqaaseqarumanngilaq.
- Inunnut ataasiakkaanut tunngasunik oqaaseqarnianngilanga. Ualiartoq taama oqarpoq.
Borgmesterinngortoq Preben Petersen oqaaseqartinniaraluaratsigu iluatsinngilarput.
