Qaanaami politiit imigassamik matusineq maluginngilaat

Qaanaami imigassamik matusineq pisimagaluartoq, Qaanaami politiit suliaat allanngungaarsimanngillat, taama Qaanaami politiini pisortaq Aage Jensen oqarpoq.

- Illoqarfinni allanisuulli Qaanaami sakkortuumik annersaasoqarneq ajorpoq, taamaallaat angerlarsimaffinni eqqissiviilliornerit imminnullu tigguttaattarnerit pisarput. Stationlederi oqarpoq nangillunilu:

- Annilaangatigisinnaasatta maannakkut annersarilerpaat, Qaanaami imigassap matuneqarnerata kingorna, aanngajaarniutinik allanik atuisoqalernissaa. Soorlu inuusuttut naamaarniarneq atugarilersinnaavaat, imaluunniit ikiaroornartoq hashi atugaalersinnaavoq, Aage Jensen oqarpoq.

Imigassaq Qaanaami matuneqarmat siunertaa politiini pisortap paasisinnaannginnerarpaa.

- Qaanaami sikuerpat innuttaasut Dundas-imut imigassaminnik pisiniartalernissaat ilimagineqarsinnaavoq, aammalu ernumagineqarsinnaavoq, Qaanaamut tikisitat imigassanik pisisinnaanerminnik pisinnaatitaaffiiarneqaramik illoqarfinnut allanut nooralernissaat.