Qaanaami pisoq Australiamut sunniuteqarpoq

Qaanaami isumaginninnikkut ajornartorsiutinut assingusunik Australiami nunap inuii ajornartorsiuteqalersimammata imigassap kimittuup aalajangersimasumik sivisussusilikkamik matugallarnissaa oqartussanit isumaliutigineqalersoq, Danmarkip Radioata tusarliuppaa.

Imigassap saniatigut ajornartorsiutit annertuut aamma ilagaat, meeqqanik kinguaassiutitigut atornerluisarneq, ajornartorsiut tamanna annertungaarmat ministeriunerup John Howardip ajunaarnersuartut allaat taavaa.

Imigassap kimittuup ukiup affaani matuneqarnissaa ministeriunerup isumaliutigaa, taamatuttaaq inuiaqatigiinni pissusilersuutigisartakkat apeqqutaatillugit aatsaat ikiorsiissuteqarsinnaalernissaq isumaliutigineqarpoq.

Australiami nunap inuiisa meerartaat annaanniarlugit atornerluisarnerit imigassamullu attuumassutilinnik persuttaasarnerit ikilisarniarlugit imigassamik kimittuumik matusigallarnissaq oqaluuserineqarpoq. Australiami nunap inuiisa meerartaasa akornanni kinguaassiutitigut atornerluinerit amerlaqisut nalunaarusiap nutaap ersersippaa.