Qaanaami piniartut sumiginnarneqartutut misigisimapput
Qaanaarmiut piniartut marluk sumiginnarneqartutut misigisimapput:
- Quianaatsorsuuvoq. Soorlu inuttut naleqanngitsutut avinngarusimasumiittugut misigisimavugut. Sumiginnakkatut naleqanngitsutullu inissisimavugut, taamak oqarumanngikkaluaruttaluunniit, Qaanaarmiu piniartoq Rasmus Avike oqarpoq.
Maannalu Qaanaarmiunut siunnersortaasoq qaninnerpaaq Upernavimmiippoq, Qaanaamiit kilometererpassuarnik kujasinnerusumi:
- Siunnersorteqarunnaarnerput nuanngitsumik misigereerparput. Siunnersorti Upernavimmiittoq paasissutissiiartorluni maanga akulikinnerusumik tikittaraluaruni pitsaanerussangaluarpoq. Uagut illoqarfitsinni siunnersortimik piiaaffigineqarsimagatta sumiginnakkatut misigisimavugut, Rasmus Avike oqarpoq.
Qaanaarmiummi piniartut tuttunniarnissamut aamma umimmanniarnissamut qinnuteqarnerminni nalornissuteqartalereersimapput:
- Soorunami siunnersorti pisariaqartittuaannarparput. Soorlu tuttunut umimmannullu qinnuteqartitsisoqalermat sumut saaffiginnissanerlunga nalorneqqaarpunga. Siunnersorteqarsimagaluarutta immaqa isillatsiaannaq piffissaq sivikitsoq atorlugu piareersimassangaluarlunga, Rasmus Avike oqarpoq.
Inuussutissarsiornermut siunnersorteqarunnaarnera piniartup allap aamma ernumanartutut nalilerpaa:
- Uanga ilaanni ernumaammertarpunga. Qilalugartassalluunniimmi aasaq manna qassiunersut naluakka. Aammalu pisarineqarsimasut sinneruttullu qassiunersut nalullugit, Aaqqiunnguaq Qaerngaq, ukiuni38-ni piniartutut inuussutissarsiuteqartoqartoq oqarpoq.
Taamaattumik illoqarfimminni inuussutissarsiornermut siunnersorteqarnissaa piniartut kissaatiginartippaat:
- Inatsisit sakkortoorsuummata killilersukkat iluamik paasisanngikkutsigit, kukkugutta qanoq iliuuseqarfigineqarsinnaagatta misigisarpunga siunnersorti pinngitsoorsinnaanagu, Aaqqiunnguaq Qaerngaq oqarpoq.
Qaanaarmiut Nunatsinni innuttaasutut allatulli naleqaramik, kissaatiginartikkaluarpaat iluamik nassuiaanneqarnissartik:
- Tassami kissaatiginaraluarpoq aggerlutik tikillutik paasissutissiinissaat. Kujataani inuttulli naleqaratta taakkunatulli pisariaqaraluarpoq orninneqarluta nassuiaanneqarnissarput, Rasmus Avike oqarpoq.
Piniartunut pisassanik ilisimatitsisarnermi saniatigut inuussutissarsiornermut siunnersorti piniartunut umiatsiaarartaarnissaminnut piniarnermullu atortussarsinissaminnut qinnuteqarniartunut siunnersuisarpoq.
