Qaanaami piniartut ilungersorput

maajip 20-at 2007 16:58

Qaanaami amernik panertunik tigooraaneq, majip 15-ani unitsinneqarpoq. Great Greenland aalajangerpoq amernik masattunik tigooraaneq nuna tamkkerlugu annertusarneqassasoq, amernilli masattunik Qaanaami tigooraaneq aamma unitsinneqarpoq, akit kipiluttunartut pissutigalugit. Piniartoq Rasmus Avike Qaanaami piniartutut massakkut inuussutissarsiuteqarnerup inissiffianik naliliisipparput.

- Inuussutissarsiorneq, Qaanaap kommuneani tamakkiisumik uninngavoq, taamatut oqarluaannarsinnaavunga. Qilaluarniarneq juulip aallaqqaataani aallartissaaq, pisassiissutillu amingarmata, piniartut paggaataasaannarlutik pinissaat ilimanarpoq, tassami ameerniarneq uninngammat.

Piniartoq Rasmus Avike aamma isumaqarpoq, puisip amianik tunisisarnermi akit apparsimanerat piniartuunermut innarliisoq.

- 533 koruunimiit 200 koruunit sinnilaaginnarlugit puisip amia akeqartinneqalermat, puisinniarneq naleerussimavoq, piniartutullu inuuniarneq ilungersunarsilluinnarsisimavoq. Kisimiittuulluni piniartutut inuuniarneq ajornarsinikuuvoq, maannakkullu takornarianut sanaalukkanik tunisassiortarneq tapertarillualernikuuarput, Rasmus Avike naggasiilluni taama oqarpoq.