Qaanaami piniartut ikiorserneqarsinnaanngillat
Qaanaap kommunia aningaasaqarnermigut annertuumik ajornartorsiorpoq, tamannattaaq innuttaasunit malugineqarpoq pingaartumik piniarnermik inuussutissarsiuteqartunit, Qaanaami piniartut peqatigiiffianni siulittaasoq Rasmus Avike ima oqarpoq.
- Illoqarfitsinni oqimaatsorsiorpugut, massakkut ukiarluttorujussuuvoq suli sikunngilagut qaleralinniarnikkut aamma periarfissaqanngilagut sikulluarnerani aatsaat qalerallit takkuttaramik. Piniartukkormiuulluni imminut piffissalernarpoq, aperinarpoq ukiuni tulliuttuni sussaanga? Isorliunerusuni suliffissatigut annertussaavigineqannginneq aallaaviugami, Rasmus Avike oqarpoq.
Rasmus Avike aamma oqarpoq aningaasatigut ajornartoornermi piniartut ataatsimoorlutik siusinnerusukkut kommunimut saaffiginnikkaangata ikiorserneqarsinnaasaraluartut.
- Siullermik ikiorserneqartarpugut maannali aningaasassaqartinneqanngilagut, kommunip aningaasaateqannginnera peqqutigalugu, Rasmus Avike oqarpoq
Qaanaameersoq 27-nik ukiulik Rasmine Jerimiassen Normann Ilinniarfissuarmi ilinniarpoq aasakkullu Qaanaaliartarluni, taanna ima oqarpoq :
- Ilinniarfissuarmiit atuanngiffeqarlunga Qaanaamiinninni atuarfimmi suliniaraluarama oqarfigineqarpunga aningaasaqarnikkut ajornartorsioramik sulisorisinnaananga, Rasmine Jerimiassen Normann oqarpoq.
Taanna nangilluni oqaluttuarpoq nalunngisani suliffissaaleqisorpassuit naapittarini, suliffissaqarsinnaassanngitsullu aningaasaqarniarnerup ilungersunarnera pissutigalugu.
Qaanaaq illoqarfinni sulissaaleqiffiunerpaavoq.
Naatsorsueqqissaartarfillu naapertorlugu ukioq manna ukiup affaata naatsorsorneqarnerani Qaanaami qaammammut suliffissaaleqisut agguaqatigiissillugu 15,3 procentimik amerlassuseqartarput.
Qaanaami kommunalbestyrelse ulluni makkunani ukiup tullissaanut karsip naatsorsuutai qanoq sipaarneqarsinnaanersut ujartuiffigaat.
Naalakkersuisut nunatta karsianut Qaanaap tapiiffigineqarnissaa pillugu 7 mio. koruuninik atorniarput, tamannali Qaanaami borgmesterip Johanne Nielsenip oqaaseqarfigerusunngikkallarpaa.
