Qaanaami piniartut eqqugaapput

Puisip amia tunineqarpat 100 koruuniinnarmik naleqalerpoq.

Ukioq mannalu Upernaviup kommuniani puisit amii tunineqartut Qaanaamut sanilliullugit amerlanerusimaqaat.

Puisit amiisa tunineqarnerini tapiissutit nungummata, puisip amiata tunineqarnera siornatigut 301 koruuneqarsimagaluartoq maanna 100 koruunit 125 koruunillu akornanni akeqartinneqalerpoq.

Namminersornerullutik Oqartussat ukioq mannamut 2005-imut puisit amii 70.000-t tunaartaralugit 22, 5 millioninik tapiipput. Puisilli amerlavallaat pisarineqarsimammata, taakku tapiissutigineqarsimagaluit nungupput. Tapeeqqittoqartariaqalerporlu; tassalu tamatumuuna puisit amii 20.000-t tunaartaralugit 1,3 millioni koruunit tapiissutigineqaqqipput.

Puisittulli amerlasimaqimmata qaammatip ataatsip ingerlanerinnaani taakku aamma nungupput. Tassalu maanna puisip amia piniartup tunippagu taamaallaat 100 koruuniinnarmik piniartoq akissarsissaaq.

Soormitaavamiuna puisit taama amerlatigisut tunilertorneqarsimatigimmata tapiisoqarsinnaajunnaartoq?

Assersuutigeriartigu Qaanaap Upernaviullu eqqaani qanoq puisittoqarsimaginera.

Taakkunani marlunni katillugit puisit 35.000-t pisarineqarsinnaapput, ukioq mannalu Qaanaap kommuniani puisit 2.502-t kisimik pisarineqarsimapput, tassa; 35.000-ninngaanniit sinneri tamaasa Upernavimmi eqqaanilu pisarineqarsimapput tassaasut: 32.500-t. Taamaalilluni naatsorsorneqarsinnaalerpoq Upernaviup kommuniani pisarineqarsimasut Qaanaap kommunianiit amerlanerusimaqisut.