Qaanaami piniartut atugaat ilisimasaqarfiginerulissapput

Qaanaami KNAPP aalajangerpoq aalisartut piniartullu atugaat missorniarlugit. Maannamut paasisaat tupaallannartoqarput – aatsaalli suliaq aallartilaarpoq. Ukiut tamaasa aalisartut piniartullu atugarisaasat ajorseriartarlutillu pitsanngoriartarneri uppernarsaaserneqartassapput, KNAPP-p Qaanaami siulittaasoq Mads Ole Kristiansen oqarpoq.

Misissuinermi sammineqarput Qaanaami aalisartut piniartullu siorna atugarisaat. Tassani misissuinermi peqataapput illoqarfiup inuussutissarsiutigalugu aalisartortaasa piniartortaasalu 45-uusut affaat. Tassani paasineqarpoq piniartut pingasut ukiumut isertitaat taamaallaat 25.000 koruuniusut isertitaqarluartortaallu ukiumut 100.000 koruunit 150.000 koruunillu akornannik isertitaqarsimasut.

Tamanna tupaallannartoq Qaanaami KNAPP-mi siulittaasoq Mads Ole Kristiansen oqarpoq.

- Assut tupaallannarpoq taama isertitakitsiginerat. Aalisartut piniartullu inuupput – sunali inuussutigaat?

Immikkut tupigusuutigineqarpoq piniartut aalisartullu pingasut 100.000 koruunit missaannik aningaasartuuteqarsimammata, arfinnillu 75.000 koruunit missaannik aningaasartuuteqarsimapput. Tassuuna takuneqarsinnaavoq aalisartut piniartullu ilaannaat ukiumut sinneqartooruteqartarsimassasut.

Taamatut misissuineq una kingulliunngilaq.

- Una misissuineq aallarniutaaginnarpoq. 2011-mi atukkat aamma misissuiffigineqassapput neriuppugullu ukiut tamaasa taamatut misissuisarumaarluta, itisilerpaalu misissuineq sumut atorneqassanersoq.

- Tassani paasiniarparput aalisartutut piniartutullu inuussutissiorneq Qaanaami qanoq ineriartorsimanersoq qanorlu ineriartornersoq.

Misissuineq siulleq Qaasuitsup Kommunianut aamma aalisartut piniartullu kattuffiannut KNAPK-mut kiisalu aalisarnermut piniarnermullu naalakkersuisumut Ane Hansen-imut nassiunneqarsimavoq, akissutigineqartulli Qaanaarmiut neriuutigisaannit allaanerusimapput.

- Pappiaraq qujassutigaat. Pappiaraq tunniukkakku neriuutigiinnanngilara atukkat ilisimaneqalernissaat ilanngullugumi neriuutigisimagaluarpara pissutsit allanngortinniarlugit suliniartoqalissasoq, Mads Ole Kristiansen oqarpoq.

Taassuma oqarnera  malillugu Qaanaarmiut siunissamut neriulluarfigaat nunaqarfiup Qeqertat eqqaanni qaleraleqarfik, neriuutigaallu tunitsiveqarnikkut periarfissat pitsaanerulernissaat aammalu aavernik pisassiissutit amerlinissaat qimminut nerukkaatissat akisummata.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat