Qaanaami piniartut ajornartorsiorput

Qaanaami piniartut aningaasaqarniarnikkut ajornartorsiortitaanertik pissutigalugu ulluni makkunani qimmimik ilaannik ikilisaallutik toqoraasariaqaleqqapput.

Immap suli sikunnginnera, piniagassaalatsineq silallu ajoqattaarnera pissutaalluni Qaanaami piniartut ulluni makkunani inuuniarnermikkut ajornartorsiortitaapput.

Piniagassakippallaarnerata kingunerisaanik aningaasatigut isertitassaqannginneq pissutaalluni qimminut nerukkaatissarsinissaq ajornakusooqaaq.

Qaanaami aalisartut piniartullu peqatigiiffiani siulittaasup tullia Lars Jeremiassen piniartuusoq ajornartorsiummik tamatuminnga aamma eqqorneqartut ilagaat.

Lars Jeremiassenip ukiup siulianut naleqqiullugu pissutsit ilungersunarluinnartut maanna atoritik, ilaatigut piniartut ilaasa qimmitik toquttariaqartarpaat nerukkaatissaqannginnerup kingunerisaanik qimmit makitarpiarsinnaanatillu saloqimmata. Erseqqisumilli oqaatigisinnaannginnerarpaa maannamut qimmit qassit toqunneqartariaqarsimanersut, assersuutigaalu nammineq 14-nik qimmeqaraluarluni, ullup ingerlanerani nammineq marluk toquttariaqassallugit qimmini allat annaatissagunigit.

Silaannaap pissusaata allanngorneranik pissuteqartumik inuuniuteqarnikkut ajornartorsiutitaasut, soorlu aalisarnermik piniarnermik nunaateqarnermillu inuuniuteqartut,  piniutaarsersimasulluunniit namminersornerullutik Oqartussanut ikiorneqarnissaminnut qinnuteqarnissamik periarfissaqarput, piniartullu qinnuteqarsinnaapput, Inatsit nutaaq juulip aallaqqaataaniit  atuutilersoq tunngavigalugu.

Aalisarnermulli pisortaqarfimmi allaffiup pisortaata  Niels Fensbo-p ilutigalugu erseqqissaatigaa piniartut atukkatik pitsanngoriartissinnaanngikkunikkit aaqqissuussinermit aningaasanik pissarsisinnaanngitsut, tassa ima paasillugu, piniartut nalinginnaasumik inuussutissarsiornerannut uterteqqinniarlugit iluaqusiisussamik tapiiffigineqarsinnaapput, kisiannili piniakkat tammarsimappata tassuunakkut ikiorsinnaanngilagut.

Inuussutissarsiornikkut ingerlatseqqinniarnermi tapiissuteqartarneq iluaqusiinngitsumik tapiinertut oqaatigisariaqassammat, Niels Fensbo oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat